راجن پور (کیو این این ورلڈ) پنجاب کے ضلع راجن پور میں نایاب نسل کی ایک شیری ٹیڈی بکری 18 لاکھ روپے میں فروخت ہونے کے بعد سوشل میڈیا اور عوامی حلقوں میں توجہ کا مرکز بن گئی۔ بکری کی فروخت اور رخصتی کی تقریب کو روایتی شادی جیسا رنگ دیا گیا، جہاں ڈھول کی تھاپ، بھنگڑوں، نوٹوں کی نچھاور اور پرتکلف دعوت کا اہتمام کیا گیا۔
میڈیا رپورٹس کے مطابق 15 کلو گرام وزنی اس شیری نسل کی ٹیڈی بکری کو اس کی منفرد رنگت، خوبصورتی اور اعلیٰ نسل کے باعث انتہائی نایاب قرار دیا جاتا ہے۔ بکری کے مالک کا کہنا تھا کہ یہی خصوصیات اس کی غیر معمولی قیمت کی بنیادی وجہ بنیں اور شوقین خریدار نے اسے 18 لاکھ روپے میں خرید لیا۔
بکری کی خریداری کے لیے خریدار درجنوں گاڑیوں پر مشتمل قافلے کی صورت میں پہنچے۔ بکری کو پھولوں کے ہاروں اور رنگ برنگی آرائش سے سجایا گیا تھا جبکہ رخصتی کے موقع پر ڈھول بجائے گئے، روایتی بھنگڑے ڈالے گئے اور خوشی کے اظہار کے لیے نوٹ بھی نچھاور کیے گئے۔
تقریب میں شریک مہمانوں کی تواضع کے لیے خصوصی طور پر بیف قورمہ اور میٹھے چاول تیار کیے گئے تھے۔ اس منفرد تقریب کو دیکھنے کے لیے مقامی شہریوں کی بڑی تعداد بھی موقع پر موجود رہی اور بکری کی رخصتی کے مناظر کو اپنے موبائل فونز میں محفوظ کرتی رہی۔
سوشل میڈیا پر وائرل ہونے والی ویڈیوز اور تصاویر میں بکری کو پھولوں سے سجا کر لوگوں کے ہجوم کے درمیان لے جاتے ہوئے دیکھا جا سکتا ہے۔ بعض مناظر میں افراد بکری کو ہاتھوں میں اٹھائے ہوئے نظر آتے ہیں جبکہ دیگر ویڈیوز میں گاڑیوں کے طویل قافلے، ڈھول کی تھاپ پر رقص اور جشن کا ماحول نمایاں دکھائی دیتا ہے۔
اس غیر معمولی فروخت پر سوشل میڈیا صارفین کی جانب سے مختلف آراء سامنے آ رہی ہیں۔ کچھ افراد اسے اعلیٰ نسل کے جانوروں سے وابستہ شوق اور محبت قرار دے رہے ہیں جبکہ بعض لوگ صرف 15 کلو وزنی بکری کی 18 لاکھ روپے قیمت پر حیرت کا اظہار کر رہے ہیں۔
ماہرین کے مطابق راجن پور اور جنوبی پنجاب کے بعض علاقوں میں شیری اور دیگر نایاب نسلوں کے جانوروں کی خرید و فروخت ایک باقاعدہ شوق کی حیثیت اختیار کر چکی ہے، جہاں منفرد نسل، خوبصورتی اور جینیاتی خصوصیات رکھنے والے جانور لاکھوں روپے میں فروخت ہوتے ہیں۔ ماضی میں بھی راجن پور سے مہنگے بکروں اور بکریوں کی فروخت کی متعدد خبریں سامنے آ چکی ہیں، تاہم 18 لاکھ روپے میں فروخت ہونے والی اس شیری ٹیڈی بکری نے حالیہ دنوں میں خاصی شہرت حاصل کی ہے۔
مصدقہ خبریں، ذمہ دارانہ صحافت
QNN World