ہرنائی (کیو این این ورلڈ) بلوچستان کے ضلع ہرنائی میں نامعلوم مسلح افراد نے ایک ٹیلی کمیونیکیشن ٹاور کو دھماکا خیز مواد سے تباہ کر دیا، جس کے نتیجے میں علاقے میں مواصلاتی نظام شدید متاثر ہو گیا اور لینڈ لائن فون و انٹرنیٹ سروس معطل ہو کر رہ گئی۔
پولیس کے مطابق واقعہ ہرنائی کے پہاڑی علاقے پان غر میں پیش آیا جہاں حملہ آوروں نے ٹیلی کمیونیکیشن ٹاور کو دھماکا خیز مواد نصب کرکے نشانہ بنایا۔ دھماکے کے باعث ٹاور مکمل طور پر تباہ ہو گیا، جس کے نتیجے میں پاکستان ٹیلی کمیونیکیشن کمپنی (پی ٹی سی ایل) کی لینڈ لائن فون اور ڈی ایس ایل انٹرنیٹ سروس بند ہو گئی۔
ذرائع کے مطابق نامعلوم افراد نے ہرنائی–سنجاوی شاہراہ پر بھی رکاوٹیں کھڑی کرکے آمدورفت متاثر کرنے کی کوشش کی، جس سے مقامی شہریوں کو مشکلات کا سامنا کرنا پڑا۔
پولیس حکام کا کہنا ہے کہ حملہ آوروں نے ڈیلکونہ پولیس تھانے کی عمارت کو بھی دھماکا خیز مواد سے نشانہ بنایا، جس کے باعث عمارت کو نقصان پہنچا۔ تاہم خوش قسمتی سے واقعے کے وقت تھانے میں کوئی پولیس اہلکار موجود نہیں تھا، جس کی وجہ سے کوئی جانی نقصان پیش نہیں آیا۔
واقعے کے بعد سکیورٹی فورسز اور پولیس نے علاقے میں سرچ آپریشن شروع کر دیا ہے جبکہ حملہ آوروں کی تلاش جاری ہے۔ حکام کا کہنا ہے کہ واقعے کی تحقیقات مختلف پہلوؤں سے کی جا رہی ہیں اور ذمہ دار عناصر کو قانون کے کٹہرے میں لایا جائے گا۔
دوسری جانب ٹیلی کمیونیکیشن سروسز کی بحالی کے لیے متعلقہ اداروں کی ٹیمیں متحرک کر دی گئی ہیں، تاہم ٹاور کی تباہی کے باعث مواصلاتی نظام کی مکمل بحالی میں کچھ وقت لگ سکتا ہے۔