راولپنڈی (کیو این این ورلڈ) چیف آف ڈیفنس فورسز فیلڈ مارشل سید عاصم منیر نے کہا ہے کہ پاکستان اور چین کی دوستی آزمودہ، مضبوط اور وقت کی ہر کسوٹی پر پوری اترنے والی شراکت داری ہے، جو بدلتے ہوئے علاقائی اور عالمی حالات کے باوجود مسلسل مستحکم ہو رہی ہے۔
پاک فوج کے شعبۂ تعلقاتِ عامہ (آئی ایس پی آر) کے مطابق جنرل ہیڈ کوارٹرز (جی ایچ کیو) راولپنڈی میں چین کی پیپلز لبریشن آرمی (پی ایل اے) کے قیام کی 99ویں سالگرہ کے موقع پر ایک پروقار تقریب کا انعقاد کیا گیا۔ تقریب میں پاکستان میں تعینات چین کے دفاعی اتاشی میجر جنرل وانگ ژونگ، چینی سفارتخانے کے اعلیٰ حکام اور پاکستان کی تینوں مسلح افواج کے سینئر افسران نے شرکت کی۔
تقریب سے خطاب کرتے ہوئے چیف آف ڈیفنس فورسز فیلڈ مارشل سید عاصم منیر نے معزز مہمانوں کا خیرمقدم کیا اور چین کی پیپلز لبریشن آرمی کو 99ویں یومِ تاسیس کی مبارکباد پیش کی۔ انہوں نے چین کے دفاع، قومی ترقی اور عالمی امن و سلامتی کے فروغ کے لیے پی ایل اے کی خدمات کو خراجِ تحسین پیش کرتے ہوئے کہا کہ چین کی مسلح افواج نے اپنے ملک کی سلامتی اور استحکام میں اہم کردار ادا کیا ہے۔
فیلڈ مارشل عاصم منیر نے اپنے خطاب میں کہا کہ پاکستان اور چین کے تعلقات باہمی اعتماد، احترام اور دیرینہ دوستی پر مبنی ہیں۔ انہوں نے کہا کہ دونوں ممالک کی دوستی ہر آزمائش اور چیلنج کے دوران مزید مضبوط ہوئی ہے اور وقت نے اس تعلق کو مزید مستحکم کیا ہے۔ ان کا کہنا تھا کہ پاک چین تعلقات صرف سفارتی یا معاشی تعاون تک محدود نہیں بلکہ دفاعی اور تذویراتی شعبوں میں بھی دونوں ممالک کے درمیان گہری ہم آہنگی موجود ہے۔
انہوں نے مزید کہا کہ پاک فوج اور چین کی پیپلز لبریشن آرمی خطے میں امن، استحکام اور مشترکہ تذویراتی مفادات کے تحفظ کے لیے حقیقی شراکت دار ہیں۔ دونوں ممالک کی افواج مختلف شعبوں میں تعاون کو فروغ دے رہی ہیں، جو علاقائی امن اور سلامتی کے لیے انتہائی اہمیت کا حامل ہے۔
اس موقع پر پاکستان میں چین کے سفیر جیانگ زائی ڈونگ نے تقریب کے انعقاد پر فیلڈ مارشل سید عاصم منیر کا شکریہ ادا کیا۔ انہوں نے دہشت گردی کے خلاف جنگ میں پاکستان کی مسلح افواج کی قربانیوں اور خدمات کو سراہتے ہوئے کہا کہ پاکستان نے خطے میں امن کے قیام کے لیے قابلِ قدر کردار ادا کیا ہے۔
آئی ایس پی آر کے مطابق چینی سفیر نے پاکستان کے ساتھ غیر متزلزل دوستی اور دوطرفہ اسٹریٹجک تعاون پر مبنی شراکت داری کو مزید مضبوط بنانے کے عزم کا بھی اعادہ کیا اور دونوں ممالک کے درمیان دفاعی و سفارتی تعاون کو مستقبل میں مزید وسعت دینے کی خواہش کا اظہار کیا۔
