اپر چترال(کیو این این ورلڈ) گورنمنٹ ہائی سکول بونی میں پاکستان کا 79واں یومِ آزادی ملی جوش و جذبے اور قومی جذبے کے ساتھ منایا گیا۔ اس سلسلے میں ایک پروقار تقریب کا انعقاد کیا گیا جس کا اہتمام حجرہ ولیج سپورٹ آرگنائزیشن (HUJRA VSO) اور پاکستان پاورٹی ایلیویشن فنڈ (PPAF) نے ضلعی انتظامیہ اور محکمہ تعلیم کے تعاون سے کیا۔
تقریب میں ڈپٹی کمشنر اپر چترال محمد عمران خان نے دیگر ضلعی افسران کے ہمراہ پرچم کشائی کی۔ قومی پرچم بلند ہوتے ہی طلبہ اور شرکاء نے قومی ترانہ پیش کیا، جبکہ تقریب میں حمد، نعت، ملی نغموں اور تقاریر کے ذریعے وطن سے محبت اور قومی یکجہتی کے جذبات کا اظہار کیا گیا۔
طلبہ نے اپنی تقاریر میں قیامِ پاکستان کے مقاصد، آزادی کی اہمیت اور ملک کی ترقی میں نوجوان نسل کے کردار کو اجاگر کیا۔ تقریب کے دوران سکول کا ماحول ملی جوش و جذبے سے بھرپور رہا اور طلبہ نے پاکستان سے اپنی والہانہ محبت کا اظہار کیا۔
تقریب کے مہمان خصوصی ڈسٹرکٹ ایجوکیشن آفیسر محمود غزنوی نے خطاب کرتے ہوئے کہا کہ پاکستان ہمارے بزرگوں کی بے مثال قربانیوں کا ثمر ہے۔ انہوں نے کہا کہ وطنِ عزیز کی حفاظت، ترقی، استحکام اور خوشحالی ہر شہری کی مشترکہ ذمہ داری ہے۔ نوجوان نسل کو چاہیے کہ وہ تعلیم پر خصوصی توجہ دے کر ملک کی تعمیر و ترقی میں اپنا کردار ادا کرے۔
تقریب کے دوران مختلف مقابلوں میں نمایاں کارکردگی کا مظاہرہ کرنے والے طلبہ کے علاوہ نویں اور دسویں جماعت کے امتحانات میں نمایاں پوزیشن حاصل کرنے والے طلبہ میں ٹرافیاں اور تعریفی اسناد بھی تقسیم کی گئیں۔ اس موقع پر طلبہ کی حوصلہ افزائی کرتے ہوئے ان کی تعلیمی و غیر نصابی سرگرمیوں میں مزید بہتر کارکردگی کے لیے نیک خواہشات کا اظہار کیا گیا۔
حجرہ وی ایس او کے نمائندے تصور حسین نے اپنے خطاب میں موسمیاتی تبدیلی کے بڑھتے ہوئے چیلنجز کی جانب توجہ دلاتے ہوئے شجرکاری اور ماحول کے تحفظ کی ضرورت پر زور دیا۔ انہوں نے کہا کہ صاف اور محفوظ ماحول آنے والی نسلوں کے بہتر مستقبل کے لیے ناگزیر ہے اور ہر فرد کو ماحولیاتی تحفظ میں اپنا کردار ادا کرنا چاہیے۔
تقریب کے اختتام پر پاکستان کی سلامتی، استحکام، امن اور خوشحالی کے لیے خصوصی دعا کی گئی۔ شرکاء نے اس عزم کا اظہار کیا کہ وہ وطنِ عزیز کی ترقی، خوشحالی اور استحکام کے لیے اپنی ذمہ داریاں احسن انداز میں ادا کرتے رہیں گے۔