کراچی (کیو این این ورلڈ/نامہ نگار ڈاکٹربشیربلوچ) ڈسٹرکٹ ایسٹ کے علاقے مبینہ ٹاؤن میں رات گئے پولیس اور کار لفٹر گینگ کے درمیان فائرنگ کا شدید تبادلہ ہوا ہے جس کے نتیجے میں دو ملزمان زخمی حالت میں گرفتار کر لیے گئے ہیں۔ ترجمان ایسٹ پولیس کے مطابق اسپارکو روڈ کے قریب پولیس نے مشکوک کار سواروں کو رکنے کا اشارہ کیا تو ملزمان نے گرفتاری کے ڈر سے پولیس ٹیم پر اندھا دھند فائرنگ شروع کر دی۔ پولیس کی جوابی فائرنگ کے بعد دو ملزمان کو زخمی حالت میں قابو کر لیا گیا جبکہ ان کے دیگر ساتھی موقع سے فرار ہونے میں کامیاب ہو گئے۔
گرفتار زخمی ملزمان کی شناخت اختر حسین ولد عبداللہ اور رجب علی خان ولد علی مراد کے ناموں سے ہوئی ہے جنہیں فوری طبی امداد کے لیے ہسپتال منتقل کر دیا گیا ہے۔ پولیس نے ملزمان کے قبضے سے دو غیر قانونی پستول، ایمونیشن، موبائل فونز، ایک ویگن آر گاڑی اور جعلی نمبر پلیٹس برآمد کی ہیں۔ اس کے علاوہ ملزمان سے گاڑیوں کے لاک اور دروازے کھولنے کے لیے استعمال ہونے والا خصوصی اوزار بھی برآمد ہوا ہے، جو ان کی پیشہ ورانہ کار لفٹنگ کی مہارت کا ثبوت ہے۔
ابتدائی تفتیش کے دوران گرفتار ملزمان نے انکشاف کیا ہے کہ وہ کراچی کے ضلع سینٹرل سے 10 سے زائد گاڑیاں چوری کرنے کی وارداتوں میں ملوث رہے ہیں۔ پولیس نے ملزمان کے خلاف ضابطے کے تحت مقدمات درج کر کے مزید تفتیش کا آغاز کر دیا ہے جبکہ ان کا سابقہ ریکارڈ بھی چیک کیا جا رہا ہے۔ فرار ہونے والے دیگر ساتھیوں کی تلاش کے لیے پولیس کی مختلف ٹیمیں چھاپے مار رہی ہیں تاکہ گینگ کے باقی ارکان کو بھی قانون کے کٹہرے میں لایا جا سکے۔