لاہور (کیو این این ورلڈ): مقبوضہ کشمیر میں شدید بارشوں کے بعد بھارت نے سلال ڈیم کے تمام گیٹ کھول دیے ہیں، جس کے نتیجے میں پانی کا بڑا ریلہ دریائے چناب کے ذریعے پاکستان کی جانب روانہ ہو گیا ہے۔ صورتحال کے پیشِ نظر پنجاب کے مختلف علاقوں میں سیلابی خطرات کے باعث ہائی الرٹ جاری کر دیا گیا ہے۔
ذرائع کے مطابق مقبوضہ کشمیر میں حالیہ موسلادھار بارشوں کے باعث پانی کی سطح میں غیر معمولی اضافہ ہوا، جس کے بعد بھارتی حکام نے سلال ڈیم کے تمام دروازے کھول کر اضافی پانی دریائے چناب میں چھوڑ دیا۔ اس اقدام کے نتیجے میں دریائے چناب میں پانی کے بہاؤ میں نمایاں اضافہ ریکارڈ کیا جا رہا ہے۔
محکمہ ایریگیشن پنجاب کے مطابق سلال ڈیم سے پانی چھوڑے جانے کے بعد دریائے چناب میں پانی کی سطح مسلسل بلند ہو رہی ہے اور پانی کا یہ ریلہ آئندہ 48 گھنٹوں کے دوران وزیرآباد کے مقام پر پہنچنے کا امکان ہے۔ حکام نے ممکنہ سیلابی صورتحال سے نمٹنے کے لیے متعلقہ اداروں کو الرٹ رہنے کی ہدایت جاری کر دی ہے۔
دوسری جانب سیالکوٹ، وزیرآباد اور دریائے چناب سے ملحقہ علاقوں میں ضلعی انتظامیہ اور ریسکیو اداروں کو ہنگامی صورتحال سے نمٹنے کے لیے تیار رہنے کی ہدایت کی گئی ہے۔ نشیبی علاقوں کے مکینوں کو بھی صورتحال پر نظر رکھنے اور سرکاری ہدایات پر عمل کرنے کا مشورہ دیا گیا ہے۔
محکمہ آبپاشی اور متعلقہ ادارے دریائے چناب میں پانی کے بہاؤ کی مسلسل نگرانی کر رہے ہیں جبکہ ممکنہ خطرات کے پیشِ نظر حفاظتی اقدامات کو مزید مؤثر بنایا جا رہا ہے۔ حکام کا کہنا ہے کہ صورتحال قابو میں ہے، تاہم عوام کو احتیاطی تدابیر اختیار کرنے اور غیر ضروری طور پر دریا کے قریب جانے سے گریز کرنے کی ہدایت کی گئی ہے۔