گوجرانوالہ (کیو این این ورلڈ/ بیوروچیف محمد رمضان نوشاہی): بورڈ پوسٹ آفس گوجرانوالہ کے سینئر ملازم عامر حسین ناز نے 60 سالہ طویل، باوقار اور ایماندارانہ سرکاری خدمت مکمل کرکے 13 اگست 2026 کو ریٹائرمنٹ اختیار کرلی۔ ان کی ریٹائرمنٹ کے موقع پر بورڈ پوسٹ آفس کے تمام اسٹاف کی جانب سے پروقار اور یادگار الوداعی تقریب کا اہتمام کیا گیا۔
تقریب میں پوسٹ ماسٹر محمد شہزاد اور جملہ اسٹاف نے عامر حسین ناز کی طویل سرکاری خدمات کو خراجِ تحسین پیش کیا۔ اس موقع پر انہیں پھولوں کے گلدستے، قیمتی تحائف اور نیک خواہشات پیش کرتے ہوئے عزت و احترام کے ساتھ رخصت کیا گیا۔ الوداعی تقریب کے دوران ہال تالیوں، محبت اور نیک تمناؤں سے گونج اٹھا۔
اس موقع پر اسٹاف کی جانب سے کہا گیا کہ عامر حسین ناز نے اپنی ملازمت کے دوران محنت، وقت کی پابندی، دیانت داری اور خوش اخلاقی کو ہمیشہ مقدم رکھا۔ ان کا سب کے ساتھ محبت اور احترام پر مبنی رویہ ساتھی ملازمین کے لیے ہمیشہ ایک مثال رہے گا۔
مقررین کا کہنا تھا کہ 60 سالہ سرکاری خدمت محض ایک ملازم کی پیشہ ورانہ زندگی نہیں بلکہ ایک پوری نسل کی خدمت اور قومی ادارے کے لیے ایک قابلِ فخر سرمایہ ہے۔ عامر حسین ناز کی خدمات اور تجربات کو ہمیشہ قدر کی نگاہ سے یاد رکھا جائے گا۔
الوداعی تقریب کے اختتام پر اسٹاف نے عامر حسین ناز کے لیے نیک تمناؤں کا اظہار کرتے ہوئے دعا کی کہ اللہ تعالیٰ انہیں صحت، سکون، خوشیوں اور برکتوں سے بھرپور ریٹائرمنٹ کی زندگی عطا فرمائے۔ آمین۔