ڈیلاویئر (مانیٹرنگ ڈیسک)امریکی شہر ڈیلاویئر میں پاکستانی نژاد امریکی نوجوان کو غیر قانونی اسلحہ رکھنے اور مبینہ حملے کی منصوبہ بندی کے الزام میں گرفتار کر لیا گیا۔ امریکی میڈیا کے مطابق 25 سالہ لقمان خان کو 24 نومبر کی رات اس وقت حراست میں لیا گیا جب پولیس نے کینبی پارک ویسٹ میں ایک ٹرک روکا۔ پولیس کے مطابق نوجوان نے گاڑی سے باہر آنے کے احکامات پر عمل نہ کیا اور مزاحمت کی۔
تلاشی کے دوران ٹرک سے پستول، میگزین اور مبینہ حملے کی منصوبہ بندی سے متعلق دستاویزات ملیں جن میں یونیورسٹی آف ڈیلاویئر کے پولیس اسٹیشن کا خاکہ، داخلی و خارجی راستوں کی نشاندہی اور ایک پولیس افسر کا نام درج تھا۔
ایک روز بعد ایف بی آئی نے 25 نومبر کو لقمان خان کے گھر پر چھاپہ مار کر مزید جدید اسلحہ بھی برآمد کیا۔ حکام کے مطابق ملزم یونیورسٹی آف ڈیلاویئر کا طالب علم اور پاکستانی نژاد امریکی شہری ہے جو مبینہ طور پر یونیورسٹی پولیس ڈپارٹمنٹ پر حملے کی منصوبہ بندی کر رہا تھا۔
لقمان خان پر غیر قانونی مشین گن رکھنے اور حملے کی منصوبہ بندی کے سنگین الزامات عائد کیے گئے ہیں۔ اسے 11 دسمبر کو عدالت میں پیش کیا جائے گا۔ حکام کا کہنا ہے کہ نوجوان کا ماضی میں کوئی کریمنل ریکارڈ موجود نہیں۔