صعدہ کی فضائی حدود میں سعودی کرائیل ڈرون تباہ کرنے کا حوثیوں کا دعویٰ
صنعاء:(کیواین این ورلڈ) یمن کے حوثی گروہ نے دعویٰ کیا ہے کہ اس نے سعودی عرب کا ایک جاسوس ڈرون صعدہ گورنریٹ کی فضائی حدود میں مار گرایا ہے۔
حوثی فوج کے ترجمان یحییٰ سریع نے اپنے بیان میں کہا کہ کرائیل (Karayel) طرز کے ڈرون کو اس وقت نشانہ بنایا گیا جب وہ صعدہ کے فضائی علاقے میں مبینہ طور پر "دشمنانہ سرگرمیوں” میں مصروف تھا۔
یحییٰ سریع کے مطابق یہ کارروائی حوثیوں کے فضائی دفاعی نظام نے انجام دی، جبکہ گروہ ملک کی خودمختاری کے تحفظ کے لیے اپنی دفاعی کارروائیاں جاری رکھے گا۔
انہوں نے مزید کہا کہ یمن کی فضائی حدود کی کسی بھی مبینہ خلاف ورزی کا جواب دینا حوثی گروہ کا "جائز حق” ہے۔
اس دعوے پر سعودی عرب کی جانب سے فوری طور پر کوئی باضابطہ ردعمل سامنے نہیں آیا، جبکہ اس واقعے کی آزاد ذرائع سے بھی تصدیق نہیں ہو سکی ہے۔