اسلام آباد (کیو این این ورلڈ)وزیر دفاع خواجہ محمد آصف نے اپنے ایک حالیہ بیان میں کہا ہے کہ پچیس سالہ طویل محنت بالآخر رنگ لے آئی ہے اور پاکستان ایک ایسے مخصوص (ایکسکلوژو) عالمی کلب کا رکن بن چکا ہے جہاں ہماری قومی سلامتی کو الحمدللہ مکمل ضمانت مل گئی ہے۔ انہوں نے وطنِ عزیز کی موجودہ سفارتی کامیابیوں کو تاریخی سنگ میل قرار دیتے ہوئے ملک کی دفاعی اور سیاسی قیادت کی کوششوں کو سراہا ہے۔
خواجہ آصف کا کہنا تھا کہ قیامِ پاکستان سے اب تک بہت کم ایسے مواقع آئے ہیں جنہیں ہم حقیقی معنوں میں تاریخ ساز اور عہد ساز قرار دے سکتے ہیں۔ ان کا کہنا تھا کہ پہلا بڑا موقع وہ تھا جب میاں نواز شریف نے تمام تر عالمی دباؤ کے باوجود جرات مندانہ اسٹینڈ لیا اور ایٹمی دھماکے کر کے ملک کا دفاع ناقابلِ تسخیر بنا دیا؛ آج پچیس سال بعد پاکستان اسی تسلسل میں ایک بار پھر عالمی سطح پر معتبر ہو کر ابھرا ہے۔
وزیر دفاع نے اپنے بیان میں دو ٹوک الفاظ میں کہا کہ جب بھی ہمارے ازلی اور ابدی دشمن بھارت نے ہمیں للکارنے کی کوشش کی، پاکستان نے اسے عبرت ناک دھول چٹائی اور پوری دنیا نے ہمارے محافظوں کی پیشہ ورانہ مہارت کا لوہا مانا۔ انہوں نے کہا کہ آج ایک سال کی بھرپور محنت کے بعد پاکستان صرف ایک دفاعی طاقت ہی نہیں بلکہ بین الاقوامی سفارت کاری کا محور اور عالمی امن کا سب سے بڑا داعی بن کر سامنے آیا ہے۔
انہوں نے مزید کہا کہ پاکستان اس وقت خطے میں صلح کے پیامبر کا کردار ادا کر رہا ہے اور اپنے بھائیوں کے درمیان دشمنیاں ختم کرانے میں مصروف ہے۔ اس وقت پوری دنیا کی نظریں اسلام آباد پر مرکوز ہیں، جو کہ پاکستان کی بڑھتی ہوئی اہمیت کا منہ بولتا ثبوت ہے۔
خواجہ آصف نے وزیراعظم شہباز شریف اور فیلڈ مارشل عاصم منیر کی قیادت کو خراجِ تحسین پیش کرتے ہوئے کہا کہ ان دونوں شخصیات کی مشترکہ بصیرت وطنِ عزیز کو نئی بلندیوں پر لے گئی ہے۔ انہوں نے دعا کی کہ اللہ تعالیٰ پاکستان کی امن پسندی کی کوششوں میں برکت ڈالے اور ملک کو ہر محاذ پر سرخرو رکھے۔ پاکستان ہمیشہ زندہ باد۔