اسلام آباد ( کیو این این ورلڈ) پاکستان اور عالمی مالیاتی فنڈ (آئی ایم ایف) کے درمیان توسیعی فنڈ سہولت (ای ایف ایف) کے تحت اسٹاف لیول معاہدہ طے پا گیا ہے۔ اس اہم پیش رفت کی تصدیق خود آئی ایم ایف حکام کی جانب سے کی گئی ہے، جس کے بعد پاکستان کے لیے اقتصادی استحکام کی جانب ایک اور بڑی رکاوٹ دور ہو گئی ہے۔
آئی ایم ایف کے مطابق، ایگزیکٹو بورڈ کی حتمی منظوری کے بعد پاکستان کو توسیعی فنڈ سہولت کے تحت ایک ارب ڈالر کی قسط جاری کی جائے گی۔ اس کے علاوہ، آر ایس ایف (ریزلیئنس اینڈ سسٹین ایبلٹی فنڈ) کے تحت مزید 21 کروڑ ڈالر تک بھی رسائی حاصل ہوگی، جس سے ملک کے زرمبادلہ کے ذخائر پر مثبت اثرات مرتب ہوں گے۔
عالمی مالیاتی ادارے کا کہنا ہے کہ ان دونوں انتظامات کے تحت اب تک کی مجموعی ادائیگیاں تقریباً 4.5 ارب ڈالر تک پہنچ جائیں گی۔ اس معاہدے کا مقصد پاکستان میں معاشی اصلاحات کے عمل کو جاری رکھنا اور مالیاتی نظم و ضبط کو بہتر بنانا ہے تاکہ ملکی معیشت کو پائیدار بنیادوں پر استوار کیا جا سکے۔