اوکاڑہ (کیو این این ورلڈ/بیورورپورٹ) کم عمر بچی کو ہراساں کرنے کے مقدمے میں پولیس نے کارروائی کرتے ہوئے مرکزی ملزم کو اس کے ساتھی سمیت گرفتار کر لیا۔ پولیس کے مطابق ملزمان کی گرفتاری سی سی ٹی وی فوٹیج اور جدید تفتیشی ذرائع کی مدد سے ممکن بنائی گئی۔
ترجمان پولیس کے مطابق تھانہ اے ڈویژن پولیس نے سیٹھ کالونی میں پیش آنے والے واقعے کی تحقیقات کے دوران مرکزی ملزم عبدالرحمان کو گرفتار کرنے کے لیے کارروائی کی۔ اس دوران ملزم نے گرفتاری سے بچنے کے لیے فرار ہونے کی کوشش کی، تاہم فرار کی کوشش کے دوران وہ زخمی ہو گیا۔ پولیس نے اسے طبی امداد فراہم کرنے کے بعد اپنی تحویل میں لے لیا۔
پولیس نے کارروائی کے دوران ملزم کے ساتھی حسنین کو بھی حراست میں لے لیا۔ حکام کا کہنا ہے کہ دونوں ملزمان سے مزید تفتیش جاری ہے اور واقعے کے مختلف پہلوؤں کا جائزہ لیا جا رہا ہے۔
ترجمان پولیس نے کہا کہ خواتین اور بچوں کے تحفظ پر کسی قسم کا سمجھوتہ نہیں کیا جائے گا اور قانون شکنی میں ملوث عناصر کے خلاف بلاامتیاز کارروائیاں جاری رہیں گی۔ انہوں نے شہریوں کو یقین دلایا کہ ایسے واقعات میں ملوث افراد کو قانون کے کٹہرے میں لایا جائے گا۔