گھوٹکی (کیو این این ورلڈ / نامہ نگار مشتاق علی لغاری) گھوٹکی شہر اور اس کے گردونواح میں عدالتی احکامات کی روشنی میں تجاوزات کے خاتمے کے لیے ضلعی انتظامیہ اور انکروچمنٹ عملے نے گرینڈ آپریشن کرتے ہوئے کارروائیوں کا سلسلہ مزید تیز کر دیا ہے۔ اس سلسلے میں شہر کے اہم تجارتی مراکز اور مختلف علاقوں میں قائم غیر قانونی تجاوزات، عارضی شیڈز اور سرکاری زمین پر بنی سٹرکچرز کو ہٹانے کا کام بلا تفریق جاری رکھا گیا۔
عملی کارروائی کے دوران شہر کے ایک بازار میں غیر قانونی قائم کی گئی دکان کو ہٹاتے وقت سخت کشیدگی دیکھنے میں آئی۔ ایک دکاندار نے انتظامیہ اور انکروچمنٹ ٹیم کی سرکاری کارروائی میں مداخلت کرتے ہوئے شدید مزاحمت کی، جس پر بات ہاتھا پائی تک جا پہنچی۔ صورتحال کو قابو میں لانے اور امن و امان برقرار رکھنے کے لیے موقع پر موجود پولیس کی بھاری نفری نے فوری اور بروقت تحرک کرتے ہوئے مزاحمت کرنے والے مذکورہ دکاندار کو موقع پر ہی گرفتار کر لیا۔
پولیس نے حراست میں لیے گئے دکاندار کو فوری طور پر قانونی چارہ جوئی کے لیے متعلقہ تھانے منتقل کر دیا ہے جہاں قانون کی طے شدہ ضوابط کے تحت واقعہ کا مقدمہ درج کرنے کے عمل سمیت مزید قانونی کارروائی جاری ہے۔
واقعے کے بعد انتظامیہ نے اپنے واضح موقف میں کہا ہے کہ عدالت عالیہ کے احکامات پر حرف بحرف عملدرآمد یقینی بنایا جائے گا۔ حکام نے خبردار کیا ہے کہ تجاوزات کے خاتمے کی مہم کے دوران سرکاری کام میں روڑے اٹکانے، کارروائی میں رکاوٹ ڈالنے یا قانون ہاتھ میں لینے والے عناصر سے کوئی رعایت نہیں برتی جائے گی اور ان کے خلاف سخت قانونی ایکشن لیا جائے گا۔
دوسری جانب شہر کی سماجی و کاروباری شخصیات اور عام شہریوں نے تجاوزات کے خلاف آپریشن کو سراہتے ہوئے مطالبہ کیا ہے کہ اس کارروائی کو صرف وقتی یا روایتی اقدام تک محدود نہ رکھا جائے۔ شہریوں نے زور دیا کہ تجاوزات کا دائمی اور مستقل بنیادوں پر سدباب کیا جائے تاکہ شہر کی مین شاہراہوں پر ٹریفک کا نظام بحال رہے اور عام پیدل چلنے والے شہریوں کو آمد و رفت میں درپیش شدید مشکلات کا خاتمہ ہو سکے۔