ڈھاکہ (کیو این این ورلڈ) بنگلادیشی حکومت نے ’ڈونلڈ ٹرمپ‘ نامی نایاب بھینسے کی قربانی روک دی ہے اور اسے محفوظ مقام پر منتقل کرنے کا فیصلہ کیا ہے۔ 700 کلوگرام وزنی یہ بھینسا عیدالاضحیٰ کے موقع پر قربانی کے لیے فروخت کیا جا چکا تھا تاہم اس کی غیر معمولی مقبولیت کے باعث صورتحال تبدیل ہو گئی۔
رپورٹ کے مطابق عیدالاضحیٰ سے قبل اس بھینسے کو دیکھنے کے لیے عوام کی بڑی تعداد فارم ہاؤس پر پہنچنے لگی، جس کے باعث وہاں رش بڑھ گیا اور سکیورٹی خدشات پیدا ہو گئے۔ لوگ دور دراز علاقوں سے صرف اس جانور کی ایک جھلک دیکھنے اور اس کے ساتھ تصاویر بنانے کے لیے آ رہے تھے، جس سے انتظامی مشکلات بھی بڑھ گئیں۔
بنگلادیشی وزارت داخلہ کے ایک عہدیدار کے مطابق وزیر داخلہ صلاح الدین احمد نے خصوصی ہدایت جاری کرتے ہوئے بھینسے کی قربانی روکنے کا حکم دیا۔ حکومتی فیصلے کے تحت جانور کے خریدار کو مکمل رقم واپس کرنے کی ہدایت کی گئی ہے۔
حکام کے مطابق اس بھینسے کو اب ڈھاکہ کے قومی چڑیا گھر منتقل کیا جائے گا تاکہ اسے محفوظ ماحول میں رکھا جا سکے اور عوام کی غیر معمولی دلچسپی کے باعث کسی بھی ممکنہ ناخوشگوار صورتحال سے بچا جا سکے۔
ابتدائی طور پر یہ ایک عام قربانی کا جانور تھا تاہم اس کے منفرد سفید رنگ، سنہرے بالوں اور پرسکون طبیعت نے اسے غیر معمولی شہرت دلائی۔ بعد ازاں سوشل میڈیا پر وائرل ہونے کے بعد اس کی مقبولیت میں مزید اضافہ ہوا اور یہ جانور مقامی سطح پر ایک کشش کا مرکز بن گیا۔