ڈیرہ غازی خان (کیو این این ورلڈ/ نیوز رپورٹر شاہد خان) علامہ اقبال ٹیچنگ ہسپتال میں انسانی زندگی بچانے کے لیے انتہائی اہم سمجھی جانے والی مانیٹول انجیکشن گزشتہ کئی ہفتوں سے نایاب ہونے کے باعث مریضوں اور ان کے لواحقین کو شدید مشکلات کا سامنا ہے۔ ہسپتال میں ایمرجنسی، آئی سی یو اور نیورو وارڈز میں اس دوا کی عدم دستیابی پر شہریوں نے تشویش کا اظہار کرتے ہوئے متعلقہ حکام سے فوری نوٹس لینے کا مطالبہ کیا ہے۔
ہسپتال ذرائع کے مطابق مانیٹول انجیکشن دماغ کی سوجن، سر کے اندر بڑھنے والے دباؤ اور آنکھوں کے بعض پیچیدہ امراض کے علاج میں استعمال ہونے والی اہم دوا ہے۔ یہ لائف سیونگ ڈرپ ہنگامی حالات میں خصوصاً سر پر شدید چوٹ لگنے، بے ہوشی، کوما اور دیگر حساس طبی صورتحال میں مریض کو فوری طور پر دی جاتی ہے تاکہ دماغ کی سوجن اور اندرونی دباؤ کو کم کرکے مریض کی جان بچائی جا سکے اور دماغ کو مستقل نقصان سے محفوظ رکھا جا سکے۔
ذرائع کا کہنا ہے کہ انجیکشن کی عدم دستیابی کے باعث مریضوں کے لواحقین کو نجی میڈیکل اسٹورز کا رخ کرنا پڑ رہا ہے، جہاں یہ دوا نہ صرف مہنگے داموں دستیاب ہے بلکہ اکثر اوقات مارکیٹ میں بھی اس کی قلت پائی جاتی ہے۔ اس صورتحال کے باعث مریضوں کے علاج میں تاخیر اور مشکلات پیدا ہو رہی ہیں۔
ایک مریض کے لواحقین نے بتایا کہ ڈاکٹر نے فوری طور پر مانیٹول انجیکشن لگانے کی ہدایت کی تھی، تاہم ہسپتال کی فارمیسی میں دوا موجود نہیں تھی۔ انہوں نے کہا کہ شہر کے متعدد میڈیکل اسٹورز پر تلاش کے باوجود انہیں یہ انجیکشن دستیاب نہ ہو سکا، جس کے باعث شدید پریشانی کا سامنا کرنا پڑا۔
طبی ماہرین کے مطابق مانیٹول انجیکشن کی کمی کے باعث برین سرجری، نیورو سرجری اور ایمرجنسی مریضوں کے علاج پر منفی اثرات مرتب ہو رہے ہیں۔ ان کا کہنا ہے کہ ایسی بنیادی اور جان بچانے والی ادویات کی مسلسل دستیابی یقینی بنانا متعلقہ انتظامیہ کی ذمہ داری ہے۔
شہریوں اور مریضوں کے لواحقین نے وزیر صحت پنجاب، ضلعی انتظامیہ، میڈیکل سپرنٹنڈنٹ (ایم ایس) اور دیگر متعلقہ حکام سے مطالبہ کیا ہے کہ علامہ اقبال ٹیچنگ ہسپتال میں مانیٹول سمیت دیگر لائف سیونگ ادویات کا فوری اسٹاک فراہم کیا جائے تاکہ مریضوں کو بروقت اور مؤثر طبی سہولیات میسر آ سکیں۔
واضح رہے کہ مانیٹول انجیکشن کی قلت اور اس کے اثرات سے متعلق معلومات ہسپتال ذرائع، مریضوں کے لواحقین اور طبی ماہرین کے بیانات پر مبنی ہیں۔اگر ہسپتال انتظامیہ کا مؤقف موصول ہوا تو اسے الگ سے شائع کیا جائے گا۔