نیویارک (کیو این این ورلڈ)دنیا کے پہلے 24 گھنٹے خبروں کے چینل CNN کے بانی Ted Turner 87 برس کی عمر میں انتقال کر گئے۔ ان کی وفات کو عالمی صحافت اور الیکٹرانک میڈیا کے ایک تاریخی دور کے خاتمے کے طور پر دیکھا جا رہا ہے۔
امریکی نشریاتی ادارے سی این این نے ٹرنر انٹرپرائزز کے جاری کردہ بیان کے حوالے سے ان کی وفات کی تصدیق کی، تاہم موت کی فوری وجہ سامنے نہیں آسکی۔ دنیا بھر کے صحافیوں، میڈیا اداروں اور اہم شخصیات نے ان کے انتقال پر گہرے دکھ اور افسوس کا اظہار کرتے ہوئے انہیں خراجِ عقیدت پیش کیا ہے۔
ٹیڈ ٹرنر کو جدید ٹی وی صحافت میں ایک انقلابی شخصیت تصور کیا جاتا تھا۔ انہوں نے 1980 میں سی این این کی بنیاد رکھ کر دنیا بھر میں خبروں کے انداز کو ہمیشہ کیلئے بدل دیا۔ یہ پہلا موقع تھا جب دنیا کو 24 گھنٹے مسلسل خبریں نشر کرنے والا ایک مکمل نیوز چینل ملا، جس نے عالمی میڈیا انڈسٹری میں نئی تاریخ رقم کی۔
ٹیڈ ٹرنر اپنی جرات مندانہ سوچ، بے باک شخصیت اور غیر روایتی فیصلوں کی وجہ سے خاص شہرت رکھتے تھے۔ انہیں مختلف القابات سے یاد کیا جاتا تھا جن میں “کیپٹن آؤٹریجس”، “ماؤتھ آف دی ساؤتھ” اور “ٹیریبل ٹیڈ” شامل ہیں۔ ان کی قیادت میں سی این این نے کئی عالمی جنگوں، سیاسی بحرانوں اور تاریخی واقعات کی براہِ راست کوریج کرکے بین الاقوامی صحافت کو نئی جہت دی۔
وہ صرف میڈیا کے شعبے تک محدود نہیں رہے بلکہ کھیلوں، ماحولیات اور فلاحی سرگرمیوں میں بھی بھرپور کردار ادا کرتے رہے۔ ٹیڈ ٹرنر نے ماحولیات کے تحفظ، جنگلات کی بقا اور انسانی فلاح کیلئے مختلف منصوبوں میں نمایاں خدمات انجام دیں۔
2018 میں ٹیڈ ٹرنر نے خود انکشاف کیا تھا کہ وہ Lewy Body Dementia نامی اعصابی بیماری میں مبتلا ہیں، جو وقت کے ساتھ انسان کی دماغی اور جسمانی صلاحیتوں کو متاثر کرتی ہے۔
عالمی میڈیا حلقوں کے مطابق ٹیڈ ٹرنر کی وفات صرف ایک شخصیت کا انتقال نہیں بلکہ صحافت کے ایک عہد کا اختتام ہے۔ انہیں جدید نشریاتی صحافت کا معمار اور عالمی میڈیا کی تاریخ کی سب سے بااثر شخصیات میں شمار کیا جاتا رہے گا۔