کوئٹہ (کیو این این ورلڈ) بلوچستان میں سکیورٹی فورسز اور سی ٹی ڈی نے ایک کامیاب انٹیلیجنس بیسڈ آپریشن کے دوران دہشت گردوں کا بڑا نیٹ ورک بے نقاب کرتے ہوئے اہم ملزمان کو گرفتار کر لیا ہے، جن کے قبضے سے بھاری مقدار میں اسلحہ اور بارود برآمد ہوا ہے۔ کوئٹہ میں ایڈیشنل چیف سیکرٹری داخلہ حمزہ شفقات کے ہمراہ پریس کانفرنس کرتے ہوئے ڈی آئی جی سی ٹی ڈی اعزاز گورایہ نے انکشاف کیا کہ گرفتار دہشت گرد ساجد احمد اسلامی یونیورسٹی اسلام آباد کا فارغ التحصیل ہے اور یونیورسٹی آف تربت میں پڑھاتا رہا ہے۔ ملزم کو پنجگور میں اس وقت گرفتار کیا گیا جب وہ بھاری مقدار میں اسلحہ تربت منتقل کرنے کی کوشش کر رہا تھا۔ ساجد احمد سوشل میڈیا پر کالعدم تنظیموں کے نظریات اور مواد نشر کرنے والے سیل کا مرکزی کردار بھی رہا ہے، جبکہ انکشاف ہوا ہے کہ اس کی بھابھی بھی بی وائی سی کی مشکوک سرگرمیوں میں ملوث رہی ہے۔
حکام نے مزید بتایا کہ آپریشن کے دوران ایک اور دہشت گرد جہانزیب مہربان کو بھی حراست میں لیا گیا ہے، جو دہشت گردی کے لیے ریکی کرنے اور فنڈز کی فراہمی میں ملوث تھا۔ جہانزیب نے ایک 18 سالہ نوجوان کو بھی ورغلا کر اپنے نیٹ ورک کا حصہ بنایا تھا۔ مزید کارروائیوں میں بیزل اور خاران کے رہائشی سرفراز نامی دہشت گردوں کو بھی گرفتار کیا گیا ہے۔ ایڈیشنل چیف سیکرٹری داخلہ حمزہ شفقات نے اس موقع پر کہا کہ پورے صوبے میں ریاست اور پولیس کی عملداری مکمل طور پر موجود ہے اور دہشت گردی کے جڑ سے خاتمے کے لیے ہر ضلع میں متعلقہ اداروں کی شاخیں قائم کی جا رہی ہیں۔ انہوں نے اطمینان کا اظہار کیا کہ فورسز کی موثر حکمت عملی کے باعث گزشتہ تین ماہ کے دوران صوبے میں دہشت گردی کے واقعات میں نمایاں کمی دیکھنے میں آئی ہے۔