اوکاڑہ (کیو این این ورلڈ/نامہ نگار ملک ظفر) مین جی ٹی روڈ پر ٹول پلازہ کے قریب منی مزدا ٹرک اور ٹرالر کے درمیان ہونے والے ہولناک تصادم کے نتیجے میں ایک شخص جاں بحق اور 3 افراد شدید زخمی ہو گئے ہیں۔ تفصیلات کے مطابق یہ حادثہ تیز رفتاری کے باعث پیش آیا جہاں ایک منی مزدا ٹرک بے قابو ہو کر آگے جانے والے ٹرالر سے پیچھے سے جا ٹکرایا، حادثے کی اطلاع ملتے ہی پولیس کے اعلیٰ حکام اور امدادی ٹیمیں فوری طور پر جائے وقوعہ پر پہنچ گئیں۔ ریسکیو اہلکاروں نے ٹرک میں پھنسے ہوئے زخمیوں اور جاں بحق ہونے والے شخص کو نکال کر قریبی ہسپتال منتقل کیا جہاں زخمیوں کو طبی امداد فراہم کی جا رہی ہے۔
ریسکیو حکام کے مطابق حادثے میں جاں بحق ہونے والے شخص کی شناخت مقبول کے نام سے ہوئی ہے جبکہ زخمیوں کی حالت بھی تشویشناک بتائی جا رہی ہے۔ پولیس نے حادثے کے بعد دونوں گاڑیوں کو قبضے میں لے کر واقعے کی باقاعدہ تحقیقات کا آغاز کر دیا ہے تاکہ حادثے کی اصل وجوہات کا تعین کیا جا سکے۔ عینی شاہدین کا کہنا ہے کہ ٹرک کی رفتار زیادہ ہونے کے باعث ڈرائیور گاڑی پر قابو نہ رکھ سکا جو اس افسوسناک واقعے کا سبب بنا، پولیس اب ضابطے کی کارروائی مکمل کر رہی ہے۔