پشاور (کیو این این ورلڈ) گورنر خیبرپختونخوا فیصل کریم کنڈی نے کہا ہے کہ غذائی تحفظ کے چیلنجز سے نمٹنے کے لیے مؤثر اقدامات ناگزیر ہیں، کیونکہ صحت مند قوم ہی ترقی کے سفر میں اہم کردار ادا کر سکتی ہے۔ کسانوں کو مضبوط بنانے اور عوام کے لیے غذائی تحفظ یقینی بنانے کے لیے تمام متعلقہ اداروں اور شعبوں کو مشترکہ کوششیں کرنا ہوں گی۔
ان خیالات کا اظہار انہوں نے گورنر ہاؤس پشاور میں عالمی یومِ خوراک کے موقع پر منعقدہ تقریب سے خطاب کرتے ہوئے کیا۔ تقریب میں سیکرٹری لائیوسٹاک ظریف المعانی، چیف ایگزیکٹو پاکستان ڈیری ایسوسی ایشن ڈاکٹر شہزاد امین، ڈائریکٹر جنرل فوڈ سیفٹی اینڈ حلال فوڈ اتھارٹی کاشف اقبال جیلانی اور دیگر متعلقہ شخصیات نے شرکت کی۔
گورنر فیصل کریم کنڈی نے کہا کہ چھوٹے کسانوں کو ضروری سہولیات فراہم کرنے کے لیے مؤثر اقدامات کرنا وقت کی اہم ضرورت ہے۔ غذائی تحفظ کے حصول کے لیے تمام متعلقہ اداروں اور شعبوں کو اپنی ذمہ داریاں ادا کرنا ہوں گی تاکہ زرعی شعبے کو مستحکم بنانے اور عوام کی غذائی ضروریات پوری کرنے میں مدد مل سکے۔
انہوں نے جدید ڈیری فارمنگ اور تحقیق کی اہمیت پر زور دیتے ہوئے کہا کہ ان شعبوں میں ترقی کے ذریعے خوراک کی پیداوار بہتر بنانے اور زرعی معیشت کو مضبوط کرنے میں مدد حاصل کی جا سکتی ہے۔ کسانوں کو سہولیات کی فراہمی اور جدید طریقوں کو فروغ دینا غذائی تحفظ کے اہداف کے حصول میں اہم کردار ادا کر سکتا ہے۔
گورنر نے اعلان کیا کہ اس مرتبہ زراعت کے شعبے سے تعلق رکھنے والے ماہرین کے نام بھی صدارتی ایوارڈز کے لیے بھجوائے جائیں گے، تاکہ زرعی شعبے میں نمایاں خدمات انجام دینے والے ماہرین کی حوصلہ افزائی کی جا سکے اور ان کی خدمات کو قومی سطح پر تسلیم کیا جائے۔
تقریب کے موقع پر پاکستان ڈیری ایسوسی ایشن اور زرعی یونیورسٹی پشاور کے درمیان مفاہمت کی یادداشت (ایم او یو) پر دستخط بھی کیے گئے۔ اس پیش رفت کو ڈیری کے شعبے میں تعاون، تحقیق اور زرعی و غذائی ترقی کے لیے باہمی اشتراک کے تناظر میں اہم قرار دیا گیا۔