قصور کے تھانہ بی ڈویژن کی حدود بیستی صابری میں ایک دل دہلا دینے والا واقعہ پیش آیا ہے جہاں ایک نوجوان نے مبینہ طور پر اپنی 60 سالہ والدہ کو قتل کر دیا۔ واقعے کے بعد علاقے میں خوف و ہراس پھیل گیا جبکہ اہلِ علاقہ شدید صدمے میں مبتلا ہیں۔
ابتدائی اطلاعات کے مطابق بلال نامی نوجوان کا اپنی والدہ کے ساتھ معمولی گھریلو تنازع ہوا، جس کے بعد وہ مبینہ طور پر اپنی والدہ کو گھر کی دوسری منزل پر لے گیا۔ وہاں ملزم نے تیز دھار آلے (ٹوکا) کے پے در پے وار کر کے اپنی والدہ کو شدید زخمی کر دیا، جو موقع پر ہی دم توڑ گئیں۔
ذرائع کے مطابق ابتدائی طور پر واقعے کی وجہ کھانا تیار نہ ہونے پر ہونے والا جھگڑا بتائی جا رہی ہے، تاہم پولیس کا کہنا ہے کہ واقعے کے تمام پہلوؤں کا باریک بینی سے جائزہ لیا جا رہا ہے اور حتمی حقائق تفتیش مکمل ہونے کے بعد ہی سامنے آئیں گے۔
واقعے کی اطلاع ملتے ہی تھانہ بی ڈویژن پولیس موقع پر پہنچ گئی اور مقتولہ کی لاش کو اپنی تحویل میں لے کر ضروری قانونی کارروائی کا آغاز کر دیا۔ پولیس نے شواہد اکٹھے کر لیے ہیں جبکہ واقعے سے متعلق مزید تحقیقات جاری ہیں۔
پولیس حکام کے مطابق مقدمے کے اندراج اور ملزم کے خلاف قانونی کارروائی کے لیے مختلف پہلوؤں سے شواہد جمع کیے جا رہے ہیں۔ انہوں نے کہا کہ تحقیقات مکمل ہونے کے بعد واقعے کی اصل وجوہات اور تمام حقائق سامنے لائے جائیں گے۔
افسوسناک واقعے کے بعد علاقے میں سوگ کی فضا چھا گئی ہے جبکہ اہلِ علاقہ نے اس واقعے پر گہرے دکھ اور افسوس کا اظہار کیا ہے۔