اوچ شریف: (کیو این این ورلڈ/نامہ نگار حبیب خان) دریائے ستلج کے کنارے بستی کبیر خان، موضع سرور آباد کے قریب ایک نامعلوم شخص کی لاش پانی میں تیرتی ہوئی ملنے سے علاقے میں تشویش کی لہر دوڑ گئی۔ واقعے کی اطلاع ملتے ہی مقامی افراد کی بڑی تعداد موقع پر جمع ہو گئی جبکہ ریسکیو 1122 اور پولیس کو فوری طور پر آگاہ کر دیا گیا۔
تفصیلات کے مطابق مقامی شہریوں نے دریائے ستلج میں ایک لاش تیرتی ہوئی دیکھی جس پر انہوں نے متعلقہ اداروں کو اطلاع دی۔ اطلاع موصول ہونے پر ریسکیو 1122 کی ٹیم اور مقامی پولیس اہلکار فوری طور پر جائے وقوعہ پر پہنچ گئے اور امدادی کارروائیاں شروع کر دیں۔
ریسکیو 1122 کے اہلکاروں نے پیشہ ورانہ مہارت کا مظاہرہ کرتے ہوئے دریا کے دوسرے کنارے سے لاش کو نکال کر اپنی تحویل میں لیا۔ بعد ازاں ضروری قانونی کارروائی مکمل کرنے کے بعد لاش کو تحصیل ہیڈکوارٹر اسپتال احمد پور شرقیہ کے سرد خانے منتقل کر دیا گیا تاکہ شناخت اور مزید تفتیش کا عمل آگے بڑھایا جا سکے۔
ذرائع کے مطابق متوفی کی فوری طور پر شناخت نہیں ہو سکی، جبکہ پولیس نے واقعے کی مختلف پہلوؤں سے تحقیقات کا آغاز کر دیا ہے۔ حکام کا کہنا ہے کہ لاش کی شناخت اور موت کی وجوہات کے تعین کے لیے ضروری اقدامات کیے جا رہے ہیں۔
مقامی شہریوں نے واقعے پر تشویش کا اظہار کرتے ہوئے مطالبہ کیا ہے کہ لاش کی جلد از جلد شناخت کی جائے اور اگر اس واقعے میں کسی قسم کے جرائم کا عنصر شامل ہے تو ذمہ داران کو قانون کے کٹہرے میں لایا جائے۔
پولیس کے مطابق لاش کی شناخت اور ابتدائی تحقیقات مکمل ہونے کے بعد واقعے سے متعلق مزید تفصیلات جاری کی جائیں گی۔