تہران (کیو این این ورلڈ) ایرانی پاسدارانِ انقلاب نے اسرائیل اور امریکہ کے خلاف "آپریشن وعدہ صادق 4” کے 19ویں مرحلے کو شروع کرنے کا باقاعدہ اعلان کر دیا ہے۔ پاسدارانِ انقلاب کے مطابق اس تازہ ترین عسکری کارروائی میں میزائلوں اور ڈرونز کے ذریعے خطے میں موجود امریکی و اسرائیلی فوجی اڈوں کو نشانہ بنایا جا رہا ہے، جس سے تل ابیب اور مقبوضہ القدس سمیت کئی اہم مقامات پر شدید نقصانات کی اطلاعات ہیں۔
ایرانی فورسز نے دعویٰ کیا ہے کہ ان حملوں کے نتیجے میں خطے میں نصب امریکہ اور اسرائیل کے 7 جدید ترین ریڈار سسٹمز مکمل طور پر تباہ ہو چکے ہیں۔ پاسدارانِ انقلاب کا کہنا ہے کہ ان حساس تنصیبات کی تباہی سے دشمن کا نگرانی اور دفاعی نظام "اندھا” ہو گیا ہے۔ کارروائی کے دوران اسرائیلی وزارتِ دفاع کی عمارت اور بن گوریان ایئرپورٹ کو بھی نشانہ بنایا گیا ہے، جس کے باعث اسرائیل میں گزشتہ 100 گھنٹوں سے سائرن بج رہے ہیں اور عوام شیلٹرز میں پناہ لینے پر مجبور ہیں۔
پاسدارانِ انقلاب کے بیان کے مطابق حملوں کا دائرہ کار اسرائیل تک محدود نہیں رہا بلکہ کویت، بحرین اور قطر میں قائم امریکی فوجی تنصیبات کو بھی ہدف بنایا گیا ہے۔ مزید برآں، بحرِ ہند میں موجود امریکی طیارہ بردار بحری جہاز "ابراہام لنکن” اور ایک ڈسٹرائر کو بھی نشانہ بنانے کا دعویٰ کیا گیا ہے۔ ایرانی حکام نے خبردار کیا ہے کہ آنے والے دنوں میں ان حملوں کی شدت اور دائرہ کار میں مزید اضافہ کیا جائے گا۔