راولپنڈی /کوئٹہ(کیو این این ورڈ)بلوچستان کے اضلاع کچھی اور خاران میں سیکیورٹی فورسز نے خفیہ اطلاعات کی بنیاد پر کارروائیاں کرتے ہوئے بھارتی سرپرستی میں سرگرم فتنۃ الہندوستان اور فتنۃ الخوارج سے منسلک 17 دہشت گردوں کو ہلاک کردیا۔ کارروائیوں کے دوران فائرنگ کے تبادلے میں پاک فوج کا 25 سالہ سپاہی حکمت اللہ شہید ہوگیا، جن کا تعلق خیبرپختونخوا کے ضلع کرک سے تھا۔
پاک فوج کے شعبہ تعلقات عامہ (آئی ایس پی آر) کے مطابق یکم نومبر 2026 کو بلوچستان کے اضلاع کچھی اور خاران میں دہشت گردوں کی موجودگی کی اطلاع پر انٹیلی جنس بیسڈ آپریشنز کیے گئے، جن میں مجموعی طور پر 17 دہشت گرد ہلاک ہوئے۔
آئی ایس پی آر کے بیان میں بتایا گیا کہ ضلع کچھی کے علاقے سنی میں سیکیورٹی فورسز نے خفیہ اطلاعات کی بنیاد پر کارروائی کی۔ اس دوران دہشت گردوں نے شہر کی سڑک بلاک کرنے کی کوشش کی، تاہم سیکیورٹی فورسز نے بروقت کارروائی کرتے ہوئے ان کی کوشش ناکام بنا دی۔ کارروائی کے دوران 10 دہشت گردوں کو ہلاک کیا گیا جبکہ ان کے قبضے سے اسلحہ اور بارود بھی برآمد ہوا۔
بیان کے مطابق ضلع خاران میں بھی دہشت گردوں کے ٹھکانوں کے خلاف انٹیلی جنس بیسڈ کارروائی کی گئی، جہاں دہشت گردوں کے ٹھکانوں کو تباہ کردیا گیا۔ اس دوران شدید فائرنگ کے تبادلے میں مزید 7 دہشت گرد مارے گئے۔ ہلاک ہونے والے دہشت گرد بھارتی سرپرستی میں سرگرم فتنۃ الخوارج سے تعلق رکھتے تھے، جن کے قبضے سے اسلحہ اور بارود برآمد کیا گیا۔
آئی ایس پی آر کے مطابق فائرنگ کے تبادلے کے دوران پاک فوج کے 25 سالہ سپاہی حکمت اللہ نے بہادری سے لڑتے ہوئے جام شہادت نوش کیا۔ شہید سپاہی کا تعلق ضلع کرک، خیبرپختونخوا سے تھا۔
بیان میں مزید کہا گیا کہ کارروائیوں کے بعد علاقے میں دہشت گردوں کی موجودگی کے خدشات دور کرنے کے لیے کلیئرنس آپریشن بھی کیا گیا۔
صدر مملکت آصف علی زرداری نے بلوچستان کے اضلاع کچھی اور خاران میں بھارتی سرپرستی میں سرگرم فتنۃ الہندوستان اور فتنۃ الخوارج سے تعلق رکھنے والے 17 دہشت گردوں کی ہلاکت پر سیکیورٹی فورسز کو خراج تحسین پیش کیا ہے۔
صدر مملکت نے ضلع کچھی میں دہشت گردوں کی جانب سے سڑک بلاک کرنے کی کوشش ناکام بنانے پر سیکیورٹی فورسز کی بروقت اور مؤثر کارروائی کو بھی سراہا۔ انہوں نے کہا کہ دہشت گردوں کے مذموم عزائم ناکام بنانے کے لیے سیکیورٹی فورسز کی پیشہ ورانہ مہارت اور مستعدی قابل تحسین ہے۔
آصف علی زرداری نے ضلع خاران میں دہشت گردوں کے ٹھکانوں کے خلاف کامیاب کارروائی اور دہشت گردوں کی ہلاکت پر بھی سیکیورٹی فورسز کو خراج تحسین پیش کیا، جبکہ کارروائی کے دوران سپاہی حکمت اللہ کی شہادت پر گہرے دکھ اور افسوس کا اظہار کیا۔
صدر مملکت کا کہنا تھا کہ وطن عزیز کے دفاع اور امن و سلامتی کے لیے سپاہی حکمت اللہ کی قربانی کو ہمیشہ یاد رکھا جائے گا۔ انہوں نے شہید کے اہل خانہ سے دلی ہمدردی اور تعزیت کا اظہار کرتے ہوئے شہید کے درجات کی بلندی اور لواحقین کے لیے صبر جمیل کی دعا کی۔
صدر آصف علی زرداری نے کہا کہ وطن عزیز سے غیر ملکی سرپرستی اور معاونت سے ہونے والی دہشت گردی کے مکمل خاتمے تک عزم استحکام کے تحت کارروائیاں جاری رہیں گی۔ انہوں نے دہشت گردی کے خلاف سیکیورٹی فورسز اور قانون نافذ کرنے والے اداروں کی مسلسل جدوجہد اور قربانیوں کو قابل فخر قرار دیا۔