اسلام آباد (کیو این این ورلڈ) وفاقی وزیر داخلہ محسن نقوی نے امریکہ اور ایران کے درمیان طے پانے والے تاریخی امن معاہدے پر اپنے گہرے ردعمل کا اظہار کرتے ہوئے فیلڈ مارشل سید عاصم منیر کی تزویراتی کوششوں کو زبردست الفاظ میں خراجِ تحسین پیش کیا ہے۔ انہوں نے اس عالمی کامیابی کو پاکستان کے لیے ایک بڑا اعزاز قرار دیا ہے۔
وزیر داخلہ محسن نقوی نے سوشل میڈیا پر جاری اپنے ایک خصوصی پیغام میں فیلڈ مارشل سید عاصم منیر کی تصویر شیئر کرتے ہوئے لکھا کہ فیلڈ مارشل سید عاصم منیر نے ایک بار پھر اپنی صلاحیتوں کا لوہا منوا لیا ہے اور انہوں نے یہ تاریخی کارنامہ سرانجام دے کر دکھایا ہے۔ محسن نقوی کا کہنا تھا کہ فیلڈ مارشل نے اس بار صرف اپنے ملک پاکستان کے لیے ہی نہیں، بلکہ پوری دنیا کے امن اور استحکام کے لیے یہ عظیم کامیابی حاصل کی ہے۔
واضح رہے کہ امریکہ اور ایران کے درمیان طویل سفارتی کوششوں کے بعد ایک جامع امن معاہدہ طے پا گیا ہے، جس کا باضابطہ اعلان گزشتہ روز وزیراعظم پاکستان محمد شہباز شریف نے اپنے ایک بیان کے ذریعے کیا تھا۔ وزیراعظم نے بتایا تھا کہ اس تاریخی معاہدے پر دستخط کی باقاعدہ تقریب 19 جون کو سوئٹزرلینڈ میں منعقد کی جائے گی۔
وزیراعظم شہباز شریف نے اس عالمی امن ڈیل میں قطر، سعودی عرب اور ترکیے کی ثالثی کے مخلصانہ کردار کو بھی سراہا تھا اور واضح کیا تھا کہ اس معاہدے کے بعد دونوں ممالک نے لبنان سمیت تمام محاذوں پر اپنی ہر قسم کی فوجی کارروائیاں فوری اور مستقل طور پر بند کرنے کا اعلان کر دیا ہے، جس کی تائید بعد ازاں عالمی سطح پر بھی کی گئی ہے۔