اسلام آباد (کیو این این ورلڈ) عالمی مالیاتی فنڈ (آئی ایم ایف) کی منیجنگ ڈائریکٹر کرسٹالینا جورجیوا نے وزیراعظم شہباز شریف کی قیادت میں پاکستان کی حکومت کی جانب سے کیے جانے والے معاشی اصلاحاتی اقدامات کی کھل کر تعریف کی ہے اور حکومت کی سنجیدہ کوششوں کو مثبت پیش رفت قرار دیا ہے۔
ڈیوس میں عالمی اقتصادی فورم کے موقع پر اظہارِ خیال کرتے ہوئے کرسٹالینا جورجیوا نے کہا کہ وہ وزیراعظم شہباز شریف کی تہہ دل سے عزت کرتی ہیں۔ ان کا کہنا تھا کہ شہباز شریف جب کسی کام کا عزم کر لیتے ہیں تو اسے مکمل کیے بغیر نہیں چھوڑتے، جو ایک مضبوط اور ذمہ دار قیادت کی نشانی ہے۔
آئی ایم ایف کی منیجنگ ڈائریکٹر نے بتایا کہ ان کی وزیراعظم شہباز شریف سے متعدد ملاقاتیں ہو چکی ہیں، جن کے دوران پہلے سے طے شدہ اہداف کے حصول، معاشی استحکام اور مستقبل کی ترقی کے لیے نئے اہداف پر تفصیلی گفتگو کی گئی۔ انہوں نے کہا کہ پاکستانی حکومت نہ صرف اصلاحات کے وعدے کر رہی ہے بلکہ عملی طور پر سنجیدگی کے ساتھ ان کا نفاذ بھی کر رہی ہے۔
کرسٹالینا جورجیوا کے مطابق حکومتی اقدامات کے مثبت نتائج آنا شروع ہو گئے ہیں اور پاکستان میں پہلی مرتبہ واضح طور پر بجٹ ڈسپلن دیکھنے میں آ رہا ہے۔ انہوں نے کہا کہ مالی نظم و ضبط کے ساتھ ساتھ وسائل کو عوام کی زندگی میں مثبت تبدیلی لانے کے لیے بروئے کار لایا جا رہا ہے، جو ایک حوصلہ افزا پیش رفت ہے۔
آئی ایم ایف سربراہ کے بیان کو عالمی سطح پر پاکستان کی معاشی پالیسیوں پر اعتماد کے اظہار کے طور پر دیکھا جا رہا ہے، جبکہ حکومتی حلقوں کا کہنا ہے کہ یہ اعتراف وزیراعظم شہباز شریف کی قیادت میں جاری معاشی اصلاحات کی درست سمت کی عکاسی کرتا ہے۔