اسلام آباد (ویب ڈیسک): اسلام آباد بلدیاتی انتخابات کے شیڈول میں تبدیلی، کاغذاتِ نامزدگی کی تاریخ میں توسیع اور پولنگ اب 15 فروری کو ہوگی
الیکشن کمیشن آف پاکستان نے اسلام آباد کے بلدیاتی انتخابات میں حصہ لینے والے امیدواروں کی سہولت کے لیے کاغذاتِ نامزدگی جمع کروانے کی مدت میں دو دن کا اضافہ کر دیا ہے، جس کے بعد اب امیدوار 30 دسمبر 2025 تک اپنی نامزدگی فائل کر سکیں گے۔ اس سے قبل کاغذات جمع کروانے کی آخری تاریخ 27 دسمبر مقرر تھی، تاہم امیدواروں کے اصرار اور انتظامی سہولت کے پیشِ نظر اس میں توسیع کی گئی ہے۔ الیکشن کمیشن کی جانب سے جاری کردہ نئے اور مکمل انتخابی شیڈول کے مطابق وفاقی دارالحکومت میں بلدیاتی معرکہ اب 15 فروری 2026، بروز اتوار کو ہوگا، جس کے لیے تمام تیاریاں مکمل کرنے کی ہدایت جاری کر دی گئی ہے۔
نئے شیڈول کی تفصیلات کے مطابق کاغذاتِ نامزدگی جمع کروانے کا عمل 22 سے 30 دسمبر تک جاری رہے گا، جبکہ امیدواروں کی ابتدائی فہرست 31 دسمبر 2025 کو شائع کی جائے گی۔ کاغذات کی جانچ پڑتال کا مرحلہ یکم جنوری سے 6 جنوری 2026 تک مکمل کیا جائے گا اور ریٹرننگ افسران کے فیصلوں کے خلاف اپیلیں 7 سے 10 جنوری تک دائر کی جا سکیں گی۔ اپیلوں پر حتمی فیصلے 12 سے 15 جنوری کے درمیان ہوں گے، جس کے فوری بعد 16 جنوری کو نظرِ ثانی شدہ فہرست سامنے آئے گی۔ امیدواروں کو کاغذات واپس لینے کے لیے 17 جنوری تک کا وقت دیا گیا ہے، جبکہ 19 جنوری 2026 کو امیدواروں کی حتمی فہرست جاری کر کے انہیں انتخابی نشانات الاٹ کر دیے جائیں گے۔ 15 فروری کو پولنگ کے بعد نتائج کی تیاری کا عمل 16 سے 19 فروری تک مکمل کر کے حتمی اعلان کیا جائے گا۔