اوکاڑہ (نامہ نگار ملک ظفر)آر پی او ساہیوال محمد ایاز سلیم نے ضلع اوکاڑہ کا تفصیلی دورہ کیا جس میں پولیس کارکردگی، عوامی سروس ڈلیوری اور جاری ترقیاتی منصوبوں کا جائزہ لیا گیا۔
دورے کا آغاز طیب سعید شہید پولیس لائنز اور ڈی پی او آفس سے ہوا، جہاں آر پی او نے یادگارِ شہداء پر سلامی پیش کی اور پھولوں کی چادر چڑھائی۔ انہوں نے شہداء کی لازوال قربانیوں کو خراجِ عقیدت پیش کرتے ہوئے شہداء کے ورثاء کی فلاح کے لیے مزید اقدامات کی یقین دہانی کرائی۔
بعدازاں آر پی او نے بلدیہ سول ریسٹ ہاؤس اوکاڑہ اور رینالہ خورد میں کھلی کچہریاں لگائیں، عوامی مسائل سنے اور موقع پر احکامات جاری کیے۔ ضلع کونسل دفتر کے سامنے شہریوں میں ہیلمٹس بھی تقسیم کیے اور ٹریفک سیفٹی آگاہی مہم کو مزید تیز کرنے کی ہدایات دیں۔
آر پی او نے سیف سٹی پراجیکٹ، تحفظ مرکز، دفتر ڈی ایس پی رینالہ اور سائبان آفس کا دورہ کیا جبکہ زیر تعمیر تھانہ بی ڈویژن اور دفتر ایس پی انویسٹیگیشن کے کاموں کا بھی جائزہ لیا۔ انہوں نے مختلف تھانوں اور خدمت مراکز کی انسپکشن بھی کی اور کارکردگی کو مزید بہتر بنانے کی ہدایات جاری کیں۔
طیب سعید شہید پولیس لائنز میں پولیس اجلاس عام سے خطاب کرتے ہوئے آر پی او نے پولیس اہلکاروں کے مسائل سنے اور ان کے حل کے لیے واضح احکامات جاری کیے۔ بعدازاں انہوں نے وکلاء، انجمن تاجران اور صحافیوں کے وفود سے بھی خصوصی ملاقاتیں کیں۔
دورے کے اختتام پر غیور ہال میں جرائم جائزہ اجلاس منعقد ہوا جس میں ڈی پی او راشد ہدایت نے ضلع میں امن و امان کی صورتحال اور جرائم کی روک تھام کے حوالے سے تفصیلی بریفنگ دی۔
آر پی او ساہیوال محمد ایاز سلیم نے کہا کہ شہریوں کی داد رسی، ان کے جان و مال کا تحفظ، جرائم کا خاتمہ اور سروس ڈلیوری میں بہتری لانا پولیس کا بنیادی مشن ہے۔