رینالہ خورد ( کیو این این ورلڈ/نامہ نگار) پاکستان پیپلز پارٹی کے سینئر رہنما، سابق ایم این اے و سابق وفاقی پارلیمانی سیکرٹری داخلہ رائے غلام مجتبیٰ کھرل رضائے الٰہی سے وفات پا گئے ہیں۔ ان کی نمازِ جنازہ کے بعد سینکڑوں سوگواروں کی موجودگی میں انہیں ان کے آبائی قبرستان موضع کنڈ بوہڑ میں سپردِ خاک کر دیا گیا ہے۔
تفصیلات کے مطابق مرحوم رائے غلام مجتبیٰ کھرل کا شمار علاقے کی برجستہ اور سینئر سیاسی شخصیات میں ہوتا تھا۔ وہ سابق وزیراعظم پاکستان محترمہ بے نظیر بھٹو کی شہادت کے بعد منعقد ہونے والے 2008ء کے عام انتخابات میں ضلع اوکاڑہ سے ممبر قومی اسمبلی (ایم این اے) منتخب ہوئے تھے اور انہوں نے بطور وفاقی پارلیمانی سیکرٹری برائے داخلہ بھی قومی خدمات سر انجام دیں۔
ان کی نمازِ جنازہ میں سیاسی و سماجی شخصیات، علاقائی عمائدین، وکلاء، صحافیوں اور شہریوں کی بڑی تعداد نے شرکت کی اور مرحوم کے درجات کی بلندی کے لیے دعا کی گئی۔ سوگواروں نے ان کی سیاسی و سماجی خدمات کو خراجِ تحسین پیش کرتے ہوئے ان کی وفات کو علاقے کے لیے بڑا نقصان قرار دیا۔