حیدرآباد (کیو این این ورلڈ) مٹیاری کے قریب وہاب شاہ ریلوے اسٹیشن کے نزدیک مال گاڑی کو پیش آنے والے حادثے کے باعث ریلوے کا نظام بری طرح متاثر ہو گیا۔ مال گاڑی کی 17 بوگیاں پٹڑی سے اتر جانے کے نتیجے میں اپ اور ڈاؤن دونوں مرکزی ریلوے ٹریک مکمل طور پر بند ہو گئے، جس کے باعث ملک کے مختلف حصوں کے درمیان ٹرینوں کی آمد و رفت معطل ہو کر رہ گئی۔
ریلوے حکام کے مطابق حادثہ مٹیاری کے قریب وہاب شاہ ریلوے اسٹیشن کے نزدیک پیش آیا، جہاں مال گاڑی کی متعدد بوگیاں اچانک ٹریک سے اتر گئیں۔ حادثے کے نتیجے میں ریلوے ٹریک کا بڑا حصہ متاثر ہوا اور دونوں اطراف سے ٹرینوں کی نقل و حرکت فوری طور پر روک دی گئی۔
ڈی ایس ریلوے سکھر فرمان غنی نے بتایا کہ حادثے کے بعد ریلیف اور بحالی کا عمل شروع کر دیا گیا ہے۔ روہڑی سے ایک ریلیف ٹرین روانہ کی گئی ہے جو رات 10 بجے تک جائے حادثہ پہنچے گی، جبکہ کوٹری سے بھی امدادی ٹرین متاثرہ مقام کی جانب روانہ کر دی گئی ہے۔ انہوں نے کہا کہ ریلوے انجینئرز اور تکنیکی عملہ ٹریک کی بحالی کے لیے متحرک ہے، تاہم نقصان زیادہ ہونے کے باعث بحالی کے کام میں وقت لگ سکتا ہے۔
انہوں نے مزید بتایا کہ حادثے کے باعث جیکب آباد سے کراچی جانے والی سکھر ایکسپریس کو منسوخ کر دیا گیا ہے، جبکہ دیگر ٹرینوں کو مختلف اسٹیشنوں پر روک دیا گیا ہے تاکہ مسافروں کی حفاظت کو یقینی بنایا جا سکے۔
دوسری جانب ڈی سی او ریلوے کراچی کے مطابق حادثے کے نتیجے میں ریلوے ٹریک کم از کم 24 گھنٹے تک بند رہنے کا امکان ہے۔ اس صورتحال کے پیش نظر آج اور کل چلنے والی متعدد ٹرینوں کا شیڈول متاثر ہوا ہے اور کئی ٹرینوں کو عارضی طور پر معطل یا مختلف اسٹیشنوں پر روک دیا گیا ہے۔
ریلوے حکام کے مطابق قراقرم ایکسپریس کو حیدرآباد اسٹیشن، علامہ اقبال ایکسپریس کو کوٹری اسٹیشن، پاکستان ایکسپریس کو لانڈھی اسٹیشن، تیزگام ایکسپریس کو ڈرگ روڈ اسٹیشن جبکہ ملت ایکسپریس اور فرید ایکسپریس کو کراچی کینٹ اسٹیشن پر روک لیا گیا ہے۔
حادثے کے بعد ریلوے انتظامیہ نے ٹریک کی جلد از جلد بحالی اور معطل ریلوے آپریشن بحال کرنے کے لیے ہنگامی اقدامات شروع کر دیے ہیں، جبکہ مسافروں کو درپیش مشکلات کے پیش نظر متبادل انتظامات کا بھی جائزہ لیا جا رہا ہے۔ ریلوے حکام کا کہنا ہے کہ بحالی کے کام میں پیش رفت سے متعلق مسافروں کو مسلسل آگاہ رکھا جائے گا۔