اسلام آباد (کیو این این ورلڈ): صدر مملکت آصف علی زرداری نے شہید بے نظیر بھٹو کے 73ویں یومِ پیدائش کے موقع پر اپنے پیغام میں کہا ہے کہ بے نظیر بھٹو کی زندگی حوصلے، قربانی اور استقامت کی روشن مثال ہے، جبکہ جمہوریت، عوامی خدمت اور آئینی بالادستی کے لیے ان کی جدوجہد پاکستان کی سیاسی تاریخ کا ایک درخشاں باب ہے۔
صدر مملکت نے کہا کہ بے نظیر بھٹو نے اپنی سیاسی بصیرت، جرات مندانہ قیادت اور عوامی وابستگی کے ذریعے ملکی سیاست میں نئی راہیں متعین کیں۔ پاکستان کی پہلی خاتون وزیر اعظم کی حیثیت سے انہوں نے خواتین کی قیادت اور سیاسی شمولیت کے دروازے کھولے اور انہیں قومی دھارے میں مؤثر کردار ادا کرنے کا حوصلہ دیا۔
آصف علی زرداری نے کہا کہ بے نظیر بھٹو جمہوری استحکام، آئینی بالادستی اور عوامی حقوق کی مضبوط علمبردار تھیں۔ انہوں نے قید و بند، سیاسی دباؤ اور جلاوطنی سمیت ہر مشکل مرحلے میں اپنے اصولی مؤقف پر ثابت قدمی کا مظاہرہ کیا اور عوامی خدمت کو سیاست کا بنیادی مقصد بنایا۔
صدر مملکت کے مطابق شہید رہنما نے تشدد اور محاذ آرائی کی سیاست کو مسترد کرتے ہوئے مکالمے، برداشت اور جمہوری روایات کے فروغ کو ترجیح دی۔ ان کی جدوجہد آج بھی محروم اور پسماندہ طبقات کی ترقی کے لیے مشعلِ راہ ہے، جبکہ ان کا وژن پاکستان کے روشن اور جمہوری مستقبل کے لیے رہنمائی فراہم کرتا ہے۔
انہوں نے کہا کہ قوم بے نظیر بھٹو کو جمہوریت، خدمت، امید اور عوامی حقوق کی علامت کے طور پر یاد رکھتی ہے۔ ان کی خدمات اور قربانیاں پاکستان کی اجتماعی قومی یادداشت کا مستقل حصہ ہیں اور آنے والی نسلوں کے لیے حوصلے اور عزم کا پیغام ہیں۔