اوکاڑہ(نامہ نگارملک ظفراقبال)محکمہ صحت و آبادی کے زیرِ اہتمام فاطمہ جناح پارک اوکاڑہ میں ایک روزہ "ایجوکیشنل فیملی میلہ” منعقد کیا گیا، جس کا بنیادی مقصد تیزی سے بڑھتی ہوئی آبادی کے سنگین سماجی و معاشی اثرات سے نمٹنے کے لیے عوامی شعور بیدار کرنا اور شہریوں کو صحت مند تفریح فراہم کرنا تھا۔ پنجاب فیملی پلاننگ پروگرام کے تحت منعقدہ اس تقریب کا باقاعدہ افتتاح اسسٹنٹ کمشنر فیصل شہزاد چیمہ نے کیا، جبکہ ضلعی آفیسر پاپولیشن ویلفیئر چوہدری عاصم ہدایت اور تحصیل آفیسر ارسلان اسحاق نے معزز مہمانوں کا استقبال کیا۔ اس موقع پر ڈسٹرکٹ ہیلتھ آفیسر ڈاکٹر یاسر سلیم، ایم ایس ڈاکٹر عادل رشید اور دیگر طبی ماہرین سمیت سول سوسائٹی کے نمائندوں اور فیملیز کی بڑی تعداد نے شرکت کی، جنہوں نے چھوٹے خاندان کی اہمیت اور صحت مند طرزِ زندگی کے حوالے سے محکمہ صحت کی کوششوں کو سراہا۔
میلے میں شرکاء کی دلچسپی کے لیے مختلف تعلیمی و تفریحی سرگرمیاں ترتیب دی گئی تھیں، جن میں صحت مند ماؤں اور بچوں کے مقابلے، پوسٹر ڈیزائننگ، کوئز پروگرامز، ہینڈی کرافٹس اور فوڈ سٹالز توجہ کا مرکز رہے۔ اس کے علاوہ میوزیکل چیئر، رسہ کشی، جھومر اور قوالی نائٹ نے میلے کی رونق کو دوبالا کر دیا اور شہریوں کو بھرپور تفریح فراہم کی۔ اسسٹنٹ کمشنر فیصل شہزاد نے تقریب سے خطاب کرتے ہوئے کہا کہ وسائل اور آبادی میں توازن برقرار رکھنا ہی آنے والی نسلوں کے حقوق کے تحفظ کی ضمانت ہے، جبکہ ضلعی آفیسر چوہدری عاصم ہدایت نے بے ہنگم آبادی کے پھیلاؤ کو روکنے کے لیے ہر شہری کی انفرادی ذمہ داری پر زور دیا۔ میلے کے اختتام پر نمایاں کارکردگی دکھانے والے شرکاء میں انعامات اور مہمانوں میں یادگاری شیلڈز تقسیم کی گئیں۔