میرپور ماتھیلو: قوم پرست جماعتوں کا ہنگامی اجلاس، شوگر مل مافیا کے خلاف دھرنے کا اعلان

میرپور ماتھیلو (ب نامہ نگار مشتاق علی لغاری) میرپور ماتھیلوں کے انڑ ہاؤس میں قوم پرست جماعتوں کا ایک انتہائی اہم اور ہنگامی مشترکہ اجلاس منعقد ہوا، جس کی صدارت سندھ یونائیٹڈ پارٹی سکھر ڈویژن کے صدر اُستاد حاتن خان شر نے کی۔ اجلاس میں مختلف قوم پرست جماعتوں کے مرکزی اور ضلعی رہنما شریک ہوئے، جن میں اکرم میتلو، کمال مہر، میر حسن لاشاری، علی شیر کانجھوں، گل منیر شر، منظور شاہ، شرف الدین انڑ اور اعجاز کلہوڑو شامل تھے۔

شوگر مل مافیا کے خلاف شدید احتجاج

اجلاس میں اس بات پر گہری تشویش اور شدید احتجاج کیا گیا کہ شوگر مِل مافیا آبادگاروں کا معاشی قتلِ عام کر رہی ہے۔ رہنماؤں نے کہا کہ

• گنے کا صحیح سرکاری نرخ مقرر نہ ہونا

• اور مل مالکان کی جانب سے کم قیمتوں کی پیشکش

ہزاروں آبادگاروں کے لیے شدید معاشی بدحالی کا سبب بن رہی ہے۔

اسی صورتحال کے پیشِ نظر صبحانے جئے سندھ محاذ ہاری فرنٹ کی جانب سے ڈی سی آفس کے سامنے دیے جانے والے دھرنے میں تمام قوم پرست جماعتوں نے مشترکہ شرکت کا اعلان کیا۔

سندھ کی تقسیم کی باتیں سختی سے مسترد

اجلاس کے شرکاء نے واضح کیا کہ سندھ پانچ ہزار سالہ تاریخ، تہذیب، زبان اور ثقافت کی حامل دھرتی ہے۔ انہوں نے کہا کہ کچھ سازشی عناصر سندھ کی تقسیم کی باتیں کر رہے ہیں، جنہیں سخت ترین الفاظ میں مسترد کیا جاتا ہے۔

رہنماؤں نے ان عناصر کو مخاطب کرتے ہوئے کہا:
"نفرت اور تعصب پھیلانے والوں کو شرم آنی چاہیے۔”

7 دسمبر کو ایکتا ڈے بھرپور جذبے سے منانے کا اعلان

مزید برآں، اجلاس میں فیصلہ کیا گیا کہ 7 دسمبر کو ایکتا ڈے ضلع گھوٹکی کے تمام چھوٹے بڑے شہروں میں پوری قوت اور جوش و جذبے سے منایا جائے گا۔
علاقے کے نوجوانوں اور عوام سے اپیل کی گئی کہ وہ زیادہ سے زیادہ تعداد میں ایکتا ڈے کے پروگراموں میں شرکت کریں۔

یہ اجلاس علاقے کی سیاسی فضا میں ایک اہم پیش رفت تصور کیا جا رہا ہے، جس میں آبادگاروں کے معاشی مسائل اور سندھ کی وحدت کے تحفظ کو یکساں اہمیت کے ساتھ اجاگر کیا گیا۔