ڈیرہ اسماعیل خان (کیو این این ورلڈ) ڈی آئی خان میں درابن روڈ پر واقع پولیس چیک پوسٹ پر دہشت گردوں کے حملے کو پولیس نے بہادری سے ناکام بناتے ہوئے دو دہشت گردوں کو جہنم واصل کر دیا ہے۔ پولیس حکام کے مطابق دہشت گردوں نے اچانک چیک پوسٹ کو نشانہ بنایا جس پر وہاں تعینات اہلکاروں نے فوری اور بھرپور جوابی فائرنگ کی۔ فائرنگ کے اس شدید تبادلے میں دو حملہ آور ہلاک ہو گئے، جبکہ دہشت گردوں کی فائرنگ کی زد میں آکر ایک پولیس اہلکار زخمی ہوا ہے جسے فوری طور پر طبی امداد کے لیے قریبی ہسپتال منتقل کر دیا گیا ہے۔ واقعے کے بعد پولیس اور سکیورٹی فورسز کی اضافی نفری نے علاقے کو گھیرے میں لے کر سرچ آپریشن شروع کر دیا ہے تاکہ فرار ہونے والے ممکنہ سہولت کاروں کا سراغ لگایا جا سکے۔
دوسری جانب صوبے میں سکیورٹی کی مجموعی صورتحال کے پیش نظر ایک اور واقعہ بنوں میں پیش آیا جہاں دہشت گردوں نے بنوں سینٹرل جیل کے مین گیٹ پر دستی بم سے حملہ کیا۔ پولیس کے مطابق خوش قسمتی سے اس حملے میں کوئی جانی نقصان نہیں ہوا اور دھماکے کے بعد دہشت گرد فرار ہونے میں کامیاب ہو گئے۔ جیل کی سکیورٹی کو مزید سخت کر دیا گیا ہے اور آس پاس کے علاقوں میں مشکوک افراد کی نگرانی بڑھا دی گئی ہے۔ خیبر پختونخوا کے مختلف اضلاع میں حالیہ چوبیس گھنٹوں کے دوران دہشت گردی کی ان کوششوں نے سکیورٹی اداروں کو ہائی الرٹ کر دیا ہے اور دہشت گردوں کے خلاف کارروائیاں تیز کر دی گئی ہیں۔