کیو این این ورلڈ:بھارتی ریاست مدھیہ پردیش میں ایک انوکھی مگر چونکا دینے والی جرم کی کہانی اپنے منطقی انجام کو پہنچ گئی۔ ریاست کے ضلعی و سیشن عدالت نے اس خاتون کو سزا سنائی ہے جس نے مردوں کو دھوکہ دے کر پانچ شادیاں کیں اور انہیں مالی نقصان پہنچایا۔
عدالت کی جج میگھا اگروال نے سماعت کے دوران کہا کہ ملزمہ نے جان بوجھ کر ایسے مردوں کو نشانہ بنایا جو تنہا زندگی گزار رہے تھے، تاکہ وہ انہیں مالی طور پر بیوقوف بنا سکے۔ عدالت کے ریکارڈ کے مطابق ملزمہ نے شادی کے بعد شوہروں پر مالی دباؤ ڈالا، اور بعض معاملات میں ذہنی و جسمانی ہراسانی کے الزامات بھی سامنے آئے۔
یہ معاملہ اُس وقت منظر عام پر آیا جب ایک متاثرہ شوہر نے شکایت درج کرائی۔ اس شخص نے الزام لگایا کہ خاتون نے خود کو غیر شادی شدہ ظاہر کیا، جبکہ شادی کے بعد معلوم ہوا کہ اس نے پہلے ہی چار شادیاں کر رکھی تھیں۔
پولیس کی تحقیقات میں یہ انکشاف ہوا کہ ملزمہ اس دھوکہ دہی کے کھیل میں اکیلی نہیں تھی بلکہ اس کی بیٹیاں اور داماد بھی اس نیٹ ورک کا حصہ تھے، اور انہوں نے متاثرہ مردوں کو لوٹنے میں مدد فراہم کی۔
عدالت نے اپنے فیصلے میں واضح کیا کہ طلاق کے بغیر بار بار شادی کرنا نہ صرف قانون کی خلاف ورزی ہے بلکہ معاشرت میں شادی جیسے مقدس رشتے پر اعتماد کو بھی نقصان پہنچاتا ہے۔ اس سزا کے ذریعے عدالت نے معاشرے کو یہ پیغام دیا کہ دھوکہ دہی اور مالی استحصال کے ذریعے شادی جیسے رشتے کو نقصان پہنچانا قابل معافی جرم نہیں۔