راولپنڈی(کیو این این ورلڈ) چیف آف ڈیفنس فورسز فیلڈ مارشل سید عاصم منیر نے واضح کیا ہے کہ قومی سلامتی کو لاحق خطرات کے حوالے سے "زیرو ٹالرنس” پالیسی اپنائی گئی ہے اور ملکی خودمختاری و علاقائی سالمیت کا تحفظ پاک فوج کا اولین مشن ہے۔ پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے لاہور گیریژن کا دورہ کیا، جہاں کور کمانڈر لاہور نے ان کا استقبال کیا۔ دورے کے دوران فیلڈ مارشل کو فارمیشن کی آپریشنل تیاریوں، تربیتی معیار اور جنگی صلاحیتوں میں اضافے کے لیے کیے گئے اقدامات پر تفصیلی بریفنگ دی گئی۔ انہوں نے فارمیشن کے زیرِ اہتمام ہونے والی خصوصی تربیتی مشقوں کا معائنہ بھی کیا اور جدید ٹیکنالوجی کے استعمال اور مستقبل کی جنگوں کے لیے جدت اپنانے کی ضرورت پر زور دیا۔
فیلڈ مارشل سید عاصم منیر نے جوانوں کو فراہم کردہ کھیلوں اور تفریحی سہولتوں کا جائزہ لیتے ہوئے ان کے مورال اور جسمانی فٹنس کو سراہا۔ انہوں نے سی ایم ایچ لاہور میں نو تعمیر شدہ ہائی کیئر سینٹر کا بھی دورہ کیا اور طبی عملے کی جانب سے فراہم کردہ عالمی معیار کی طبی سہولیات کی تعریف کی۔ لاہور گیریژن میں افسران و جوانوں سے خطاب کرتے ہوئے فیلڈ مارشل نے اس عزم کا اعادہ کیا کہ پاکستان کی مسلح افواج ہر قسم کے اندرونی و بیرونی چیلنجز سے نمٹنے کے لیے ہمہ وقت تیار اور پرعزم ہیں۔ انہوں نے کہا کہ پاک فوج نظم و ضبط، پیشہ ورانہ مہارت اور بے لوث قومی خدمت کے اعلیٰ معیار کو فروغ دے رہی ہے تاکہ ملک کا دفاع ناقابلِ تسخیر رہے اور داخلی استحکام کو کسی صورت متاثر نہ ہونے دیا جائے۔