اسلام آباد:(کیو این این ورلڈ) وزیراعظم محمد شہباز شریف نے بنگلہ دیش کی سابق وزیراعظم اور بنگلہ دیش نیشنلسٹ پارٹی کی چیئرپرسن بیگم خالدہ ضیاء کے انتقال پر رنج و ملال کا اظہار کرنے کے لیے عوامی جمہوریہ بنگلہ دیش کے ہائی کمیشن کا دورہ کیا ہے۔ دورے کے دوران وزیراعظم نے بنگلہ دیش کے ناظم الامور سے ملاقات کی اور مرحومہ کے درجات کی بلندی کے لیے فاتحہ خوانی کرتے ہوئے تعزیتی کتاب میں اپنے تاثرات قلم بند کیے۔ وزیراعظم نے بیگم خالدہ ضیاء کو ایک صاحبِ بصیرت مدبر اور ممتاز سیاسی رہنما قرار دیتے ہوئے کہا کہ انہوں نے اپنی پوری زندگی عوامی خدمت اور جمہوری اقدار کی سربلندی کے لیے وقف کر رکھی تھی، جس کی بدولت انہیں بنگلہ دیشی سیاست میں ایک بلند مقام حاصل رہا۔
تعزیتی پیغام میں وزیراعظم شہباز شریف نے بیگم خالدہ ضیاء کی پاکستان کے لیے محبت کا ذکر کرتے ہوئے کہا کہ وہ پاکستان اور یہاں کے عوام کی مخلص دوست اور خیر خواہ تھیں، جن کی خدمات کو ہمیشہ قدر کی نگاہ سے دیکھا جائے گا۔ انہوں نے حکومتِ پاکستان اور عوام کی جانب سے مرحومہ کے اہل خانہ، بنگلہ دیش نیشنلسٹ پارٹی کے کارکنان اور بنگلہ دیشی عوام سے دلی ہمدردی کا اظہار کیا اور دعا کی کہ اللہ تعالیٰ انہیں جنت الفردوس میں جگہ عطا فرمائے۔ اس اہم موقع پر وفاقی وزیرِ اطلاعات و نشریات عطاء اللہ تارڑ اور معاونِ خصوصی طارق فاطمی بھی وزیراعظم کے ہمراہ موجود تھے۔