کراچی(کیو این این ورلڈ) شہرِ قائد کے مختلف علاقوں میں جرائم اور حادثات کی لہر برقرار ہے، جہاں ناظم آباد میں ایک پراسرار فائرنگ کے واقعے میں 6 سالہ بچی زخمی ہو گئی جبکہ پولیس مقابلوں میں 7 ڈاکوؤں کو حراست میں لے لیا گیا ہے۔ تفصیلات کے مطابق ناظم آباد نمبر 2 نادریہ کے قریب اتوار اور پیر کی درمیانی شب نامعلوم سمت سے آنے والی گولی لگنے سے کمسن بچی عزیزہ زخمی ہوئی، جسے فوری طور پر عباسی شہید اسپتال منتقل کیا گیا۔ دوسری جانب پولیس نے شہر کے مختلف حصوں جوہر آباد، قائد آباد، ڈیفنس اور عید گاہ میں اسٹریٹ کریمنلز کے خلاف مؤثر کارروائیاں کرتے ہوئے مجموعی طور پر 7 ڈاکوؤں کو گرفتار کیا ہے، جن میں سے 4 زخمی حالت میں زیرِ حراست ہیں۔ ان کارروائیوں کے دوران ملزمان سے اسلحہ، موٹر سائیکلیں، چھینی گئی نقدی اور موبائل فونز برآمد ہوئے ہیں، تاہم ایک ملزم فرار ہونے میں کامیاب رہا۔
اسی دوران شاہراہِ فیصل ایئرپورٹ سگنل کے قریب ایک المناک ٹریفک حادثہ پیش آیا جس میں 50 سالہ خاتون رخسانہ جاں بحق ہو گئیں۔ عینی شاہدین کے مطابق خاتون اپنے اہل خانہ کے ہمراہ موٹر سائیکل پر سوار تھیں کہ سڑک پر موجود کھڈے کے باعث توازن بگڑنے سے نیچے گر پڑیں اور پیچھے سے آنے والی تیز رفتار کار کی زد میں آ گئیں، کار سوار موقع سے فرار ہونے میں کامیاب ہو گیا جبکہ پولیس نے لاش کو جناح اسپتال منتقل کر کے قانونی کارروائی شروع کر دی ہے۔ اسی طرح نشتر روڈ پر عید گاہ پولیس نے پیٹرولنگ کے دوران شہریوں سے لوٹ مار کرنے والے دو ڈکیتوں قربان اور عرفان کو فائرنگ کے تبادلے کے بعد زخمی حالت میں گرفتار کر کے ان کے قبضے سے چھینا ہوا سونا اور اسلحہ برآمد کر لیا ہے، پولیس حکام کا کہنا ہے کہ شہر بھر میں جرائم پیشہ عناصر کے خلاف کریک ڈاؤن مزید تیز کر دیا گیا ہے۔