اسلام آباد: (کیو این این ورلڈ)وزیراعظم شہباز شریف نے خیبرپختونخوا کے ضلع کوہاٹ میں واقع ناشپا بلاک میں تیل و گیس کے بڑے ذخائر کی دریافت پر قوم کو مبارکباد پیش کرتے ہوئے متعلقہ اداروں کی کارکردگی کو سراہا ہے۔ وزیراعظم کی زیر صدارت پیٹرولیم ڈویژن کے امور پر منعقدہ ایک اہم اجلاس میں آئل اینڈ گیس ڈیولپمنٹ کمپنی (او جی ڈی سی ایل) نے پیٹرولیم اور گیس سیکٹر کے مستقبل کے روڈ میپ کے حوالے سے تفصیلی بریفنگ دی۔ وزیراعظم نے اس موقع پر گفتگو کرتے ہوئے کہا کہ ملک میں تیل و گیس کے نئے ذخائر کی تلاش ہماری اولین ترجیحات میں شامل ہونی چاہیے تاکہ پیٹرولیم مصنوعات کی درآمد پر اٹھنے والے بھاری اخراجات کو کم کر کے قیمتی زر مبادلہ بچایا جا سکے۔ انہوں نے مزید کہا کہ مقامی سطح پر توانائی کے وسائل کی ترقی ملکی معیشت کی مضبوطی کے لیے ناگزیر ہے۔
وزیراعظم نے اجلاس کے دوران تیل و گیس کی سپلائی چین کو درآمدی مرحلے سے لے کر صارفین تک پہنچنے تک کے تمام عمل کو ترجیحی بنیادوں پر ڈیجیٹلائز کرنے کی سخت ہدایت جاری کی۔ ان کا کہنا تھا کہ سپلائی چین کی مکمل ڈیجیٹلائزیشن سے نہ صرف پیٹرولیم مصنوعات کی اسمگلنگ کی روک تھام ممکن ہوگی بلکہ اس سے قومی خزانے کو پہنچنے والے نقصانات کا بھی خاتمہ ہوگا۔ اجلاس کو بریفنگ کے دوران بتایا گیا کہ کوہاٹ کے ناشپا بلاک سے ہونے والی اس نئی دریافت کے نتیجے میں یومیہ 4100 بیرل تیل حاصل کیا جا سکے گا، جو ملکی پیداوار میں ایک اہم اضافہ ثابت ہوگا۔ حکام نے یہ بھی بتایا کہ اس سال سردیوں کے دوران گھریلو صارفین کو گزشتہ برس کے مقابلے میں بہتر پریشر کے ساتھ گیس فراہم کی جا رہی ہے جو کہ انتظامی بہتر اقدامات کا نتیجہ ہے۔
اجلاس کو مزید آگاہ کیا گیا کہ آر ایل این جی (RLNG) کے نئے کنکشنز کی فراہمی پر کام تیزی سے جاری ہے اور جون 2026 تک 3 لاکھ 50 ہزار کنکشنز فراہم کرنے کا ہدف مکمل کر لیا جائے گا۔ بریفنگ میں یہ بھی بتایا گیا کہ شیوا اور بٹانی گیس فیلڈز کے لیے پائپ لائنز کو فعال (Commission) کر دیا گیا ہے جبکہ کوٹ پالک گیس فیلڈ سے پائپ لائن بچھانے کا کام تیزی سے مکمل کیا جا رہا ہے۔ وزیراعظم نے ان تمام منصوبوں کی بروقت تکمیل اور شفافیت کو یقینی بنانے پر زور دیا تاکہ عوام کو توانائی کے بحران سے مستقل نجات مل سکے۔