اسلام آباد(کیو این این ورلڈ) پارلیمنٹ کے مشترکہ اجلاس نے خیبر پختونخوا میں ایمرجنسی اور گورنر راج کے نفاذ کی آئینی و انتظامی بنیادوں پر بھاری کثرتِ رائے سے توثیق کر دی ہے۔ اجلاس کے دوران وفاقی وزیر طارق فضل چوہدری نے ایمرجنسی اور گورنر راج سے متعلق الگ الگ قراردادیں ایوان میں پیش کیں، جس کے بعد صدارتی فرمان پر باقاعدہ رائے شماری کروائی گئی۔
صوبے میں ایمرجنسی کے نفاذ کی تحریک کے حق میں 214 ووٹ آئے جبکہ مخالفت میں صرف 56 ارکان نے ووٹ دیا، یوں ایوان نے واضح اکثریت کے ساتھ ان اقدامات کی منظوری دے دی۔
اسی اہم اجلاس کے موقع پر ایک نمایاں سیاسی پیش رفت بھی دیکھنے میں آئی جب وزیراعظم کی اپوزیشن کے سینئر رہنما محمود خان اچکزئی سے غیر رسمی ملاقات ہوئی۔
ملاقات کے دوران وزیراعظم نے ملکی سیاسی کشیدگی کو ختم کرنے کی ضرورت پر زور دیتے ہوئے اپوزیشن کو ایک بار پھر سنجیدہ مذاکرات کی دعوت دی۔ وزیراعظم کا کہنا تھا کہ چیف الیکشن کمشنر اور الیکشن کمیشن کے دیگر ارکان کی تقرری جیسے انتہائی اہم اور لازمی آئینی معاملے پر پچھلے ایک سال سے تعطل برقرار ہے، اس لیے اس اہم قومی ضرورت کو پورا کرنے کے لیے کسی کو بھی سیاست نہیں کرنی چاہیے۔
اس طرح پارلیمنٹ کا یہ مشترکہ اجلاس خیبر پختونخوا میں اہم انتظامی فیصلے کی منظوری کے ساتھ ساتھ سیاسی افہام و تفہیم کے ایک نئے راستے کی نشان دہی بھی کر گیا۔