خیبر(کیو این این ورلڈ/بیوروچیف نصیب شاہ شینواری)لنڈی کوتل میں ایلیٹ کیئر جنرل ہسپتال پشاور کی جانب سے تین روزہ مفت فزیوتھراپی کیمپ کا انعقاد کیا گیا، جس میں مختلف جسمانی اور بحالی سے متعلق مسائل کا شکار مریضوں کا مفت معائنہ، تشخیص اور علاج کیا گیا۔
میڈیا سے گفتگو کرتے ہوئے ڈاکٹر اویس نے بتایا کہ مفت فزیوتھراپی کیمپ 5 سے 7 اکتوبر تک منعقد ہوا، جس میں ماہر اور تجربہ کار ڈاکٹروں اور فزیوتھراپسٹس پر مشتمل ٹیم نے مریضوں کو مفت طبی مشاورت اور علاج کی سہولت فراہم کی۔
انہوں نے بتایا کہ طبی ٹیم میں ڈاکٹر مبشر حسن، ڈاکٹر ماریہ خان، ڈاکٹر جمیلہ خان اور ڈاکٹر گل اندام شامل تھے، جنہوں نے کیمپ کے دوران آنے والے مریضوں کا معائنہ کیا اور انہیں ان کے جسمانی مسائل کے حوالے سے ضروری طبی مشاورت اور فزیوتھراپی کی سہولیات فراہم کیں۔
ڈاکٹر اویس کے مطابق کیمپ کے دوران 120 سے زائد مرد، خواتین اور بچوں کو مفت مشاورت اور علاج فراہم کیا گیا۔ ان مریضوں میں پٹھوں، اعصاب اور جوڑوں کے درد سمیت مختلف جسمانی مسائل کا شکار افراد شامل تھے۔
کیمپ میں پشاور، لنڈی کوتل، باڑہ، چارسدہ، لوئر دیر اور مردان سے مریضوں نے شرکت کی۔ کمر، گردن، کندھے، گھٹنے اور پاؤں کے درد میں مبتلا افراد کے علاوہ مختلف جسمانی مسائل، معذوری اور جسمانی کمزوریوں کا شکار بچوں کا بھی معائنہ کیا گیا۔
ڈاکٹر اویس نے کہا کہ مفت فزیوتھراپی کیمپ کے انعقاد کا مقصد عوام میں فزیوتھراپی کے حوالے سے آگاہی پیدا کرنا اور بنیادی بحالی کی طبی سہولیات ان افراد تک پہنچانا ہے جو مالی مشکلات یا آگاہی کی کمی کے باعث علاج میں تاخیر کرتے ہیں۔
انہوں نے کہا کہ کیمپ کو عوام کی جانب سے ملنے والے مثبت ردعمل کی بنیاد پر مستقبل میں بھی کمیونٹی آؤٹ ریچ پروگرام جاری رکھنے اور اسی نوعیت کے مفت یا کم لاگت والے فزیوتھراپی کیمپس منعقد کرنے کا ارادہ ہے، بالخصوص ان افراد کے لیے جنہیں بحالی کی طبی سہولیات تک محدود رسائی حاصل ہے۔
مفت طبی کیمپ میں آنے والے مریضوں نے ایلیٹ کیئر جنرل ہسپتال اور اس کے عملے کا شکریہ ادا کرتے ہوئے مفت فزیوتھراپی اور طبی مشاورت کی فراہمی کو سراہا۔