نیویارک (کیو این این ورلڈ ) یو این سیکرٹری جنرل گوتریس پاکستان کی امن کوششوں اور دہشتگردی کے خلاف قربانیوں کے معترف,نیویارک میں اہم ملاقات, وزیراعظم نے فلسطینی ریاست کے حق اور اسلاموفوبیا پر بات کی،گوتریس نے پاکستان کی سفارتی ثالثی اور عالمی سلامتی میں خدمات کو خراج تحسین پیش کیا
اقوام متحدہ کی جنرل اسمبلی کے 81ویں اجلاس کے موقع پر وزیراعظم محمد شہباز شریف نے اقوام متحدہ کے سیکرٹری جنرل انتونیو گوتریس سے اہم ملاقات کی۔ ملاقات کے دوران سیکرٹری جنرل نے پاکستان کے عالمی امن و سلامتی کے لیے کردار اور خدمات کو کھلے الفاظ میں سراہا۔
وزیراعظم نے ملاقات میں اقوام متحدہ کے منشور کے مقاصد اور اصولوں سے پاکستان کی مضبوط وابستگی کا اعادہ کیا۔ دونوں رہنماؤں نے خطے میں امن و استحکام کے فروغ کے عزم پر بھی اتفاق کیا۔ وزیراعظم نے سیکرٹری جنرل انتونیو گوتریس کی قیادت کو سراہتے ہوئے ان کی عالمی سطح پر امن کے لیے کاوشوں کو مثبت قرار دیا۔
ملاقات میں مشرق وسطیٰ کی صورتحال سمیت اہم علاقائی اور عالمی امور پر تفصیلی تبادلہ خیال ہوا۔ وزیراعظم شہباز شریف نے فلسطینی عوام کے حقِ خودارادیت اور آزاد و خودمختار ریاست کے قیام کے حق کے لیے پاکستان کی غیرمتزلزل حمایت کا اعادہ کیا۔ انہوں نے عالمی برادری سے فلسطینی مسئلے کے پرامن اور منصفانہ حل کی ضرورت پر زور دیا۔
وزیراعظم نے اسلاموفوبیا کے بڑھتے ہوئے رجحان سے سیکرٹری جنرل کو آگاہ کیا اور اس کے خلاف مؤثر عالمی اقدامات کی ضرورت پر زور دیا۔ دونوں رہنماؤں نے افغانستان کی موجودہ صورتحال اور افغان سرزمین سے دہشتگردی میں تشویشناک اضافے پر بھی بات چیت کی۔ وزیراعظم نے دہشتگردی کے خلاف عالمی جدوجہد میں پاکستان کے کردار اور بے مثال قربانیوں کا ذکر کیا۔
سیکرٹری جنرل انتونیو گوتریس نے پاکستان کے عالمی امن و سلامتی کے لیے کردار اور خدمات کو سراہا۔ انہوں نے تنازعات کے پرامن حل، خطے میں پائیدار امن و استحکام کے لیے پاکستان کی سفارتی اور ثالثی کوششوں کو خراج تحسین پیش کیا۔ گوتریس نے دہشتگردی کے خلاف جنگ میں پاکستان کے کردار اور قربانیوں کو بھی خصوصی طور پر سراہا۔
یہ ملاقات ایسے وقت میں ہوئی جب عالمی سطح پر امن، دہشتگردی اور علاقائی تنازعات کے مسائل شدت اختیار کیے ہوئے ہیں۔ وزیراعظم کی اس ملاقات کو پاکستان کی خارجہ پالیسی اور اقوام متحدہ کے ساتھ تعلقات کے تناظر میں اہم پیش رفت قرار دیا جا رہا ہے۔