اسلام آباد (کیو این این ورلڈ) بلوچستان کے ضلع چاغی اور خیبرپختونخوا کے ضلع صوابی میں پیش آنے والے الگ الگ ٹریفک حادثات کے نتیجے میں مجموعی طور پر 9 افراد جان کی بازی ہار گئے جبکہ 13 افراد زخمی ہو گئے۔
پولیس کے مطابق بلوچستان کے ضلع چاغی میں یک مچ کے قریب دو گاڑیوں کے درمیان شدید تصادم ہوا، جس کے نتیجے میں 7 افراد موقع پر ہی جاں بحق جبکہ 3 افراد زخمی ہو گئے۔ حادثے کے بعد لاشوں اور زخمیوں کو فوری طور پر دالبندین اسپتال منتقل کیا گیا، جہاں زخمیوں کو طبی امداد فراہم کی جا رہی ہے۔ پولیس کا کہنا ہے کہ حادثے کی وجوہات جاننے کے لیے تحقیقات کا آغاز کر دیا گیا ہے۔
دوسری جانب خیبرپختونخوا کے ضلع صوابی میں موٹر وے ایم ون پر انبار انٹرچینج کے قریب خوفناک حادثہ پیش آیا، جہاں 5 گاڑیاں آپس میں ٹکرا گئیں۔ ریسکیو حکام کے مطابق اس حادثے میں 2 افراد جاں بحق جبکہ 10 افراد زخمی ہو گئے۔ زخمیوں اور لاشوں کو باچا خان میڈیکل کمپلیکس منتقل کر دیا گیا ہے۔
ریسکیو ذرائع کے مطابق حادثے کا شکار گاڑیاں پشاور سے اسلام آباد کی جانب جا رہی تھیں۔ حادثے کے باعث موٹر وے پر کچھ دیر کے لیے ٹریفک کی روانی متاثر رہی، تاہم بعد ازاں کلیئرنس کے بعد ٹریفک بحال کر دی گئی۔ ابتدائی طور پر دونوں حادثات کی وجوہات معلوم نہیں ہو سکیں، جبکہ متعلقہ اداروں کی جانب سے تحقیقات جاری ہیں۔