کولمبو(کیو این این ورلڈ)آئی سی سی ٹی ٹوئنٹی ورلڈ کپ کا میلہ آج سے سج رہا ہے جس میں دنیا کی 20 ٹیمیں کرکٹ کی عالمی جنگ میں حصہ لے رہی ہیں۔ ایونٹ کے لیے ٹیموں کو چار مختلف گروپس میں تقسیم کیا گیا ہے اور پہلے ہی روز تین اہم میچز کھیلے جائیں گے۔
پاکستان کرکٹ ٹیم گروپ اے میں شامل ہے اور آج اپنے پہلے معرکے میں نیدرلینڈز کے خلاف میدان میں اترے گی۔ یہ میچ پاکستانی وقت کے مطابق صبح ساڑھے 10 بجے شروع ہوگا، تاہم میچ کے دوران بارش کی پیش گوئی بھی کی گئی ہے۔
گرین شرٹس نے اس اہم مقابلے کے لیے کولمبو میں بھرپور مشقیں کی ہیں، جہاں کھلاڑیوں نے بیٹنگ، بولنگ اور فیلڈنگ کے شعبوں میں اپنی مہارت کو نکھارا۔ ایونٹ کے دیگر میچوں میں ویسٹ انڈیز کا مقابلہ اسکاٹ لینڈ سے ہوگا جبکہ میزبان امریکہ کی ٹیم بھارت کے مدمقابل آئے گی۔
قومی ٹیم کے کپتان سلمان علی آغا نے میچ سے قبل گفتگو کرتے ہوئے واضح کیا کہ وہ نمبر تین پر ہی بیٹنگ کا سلسلہ برقرار رکھیں گے۔ انہوں نے دوٹوک انداز میں کہا کہ ٹیم کی ضرورت سب سے مقدم ہے؛ چاہے فخر زمان ہوں یا بابر اعظم، جو کھلاڑی بہترین ہوگا وہی ٹیم کا حصہ بنے گا۔
دوسری جانب نیدرلینڈز کے بیٹر میکس اوڈاوڈ نے پاکستان کو ایک مضبوط حریف قرار دیتے ہوئے اعتراف کیا ہے کہ انہیں شکست دینا ایک مشکل چیلنج ہوگا۔ شائقینِ کرکٹ اس عالمی ایونٹ کے تمام میچز جیو سوپر اور مائیکو ایپ پر براہِ راست دیکھ سکیں گے۔