سوڈان کے جنوبی کوردفان کے قصبے کلوگی میں ایک ہسپتال اور کنڈرگارٹن پر ڈرون حملے میں 63 بچوں سمیت مجموعی طور پر 114 افراد ہلاک ہوگئے۔
عالمی ادارہ صحت کے سربراہ ٹیڈروس ایڈہانوم گیبرییسیس نے اس حملے کو بے معنی اور ظالمانہ قرار دیتے ہوئے شدید مذمت کی ہے۔ ٹیڈروس کے مطابق حملے میں بے گناہ شہری، خاص طور پر بچے، ہلاک ہوئے اور یہ انسانی حقوق کی سنگین خلاف ورزی ہے۔
سوڈان کے فوج اور مقامی طبی تنظیم سوڈان ڈاکٹرز نیٹ ورک نے حملے کا الزام نیم فوجی ملیشیا ریپڈ سپورٹ فورسز (آر ایس ایف) پر لگایا ہے، جو اپریل 2023 سے جاری خانہ جنگی میں سوڈانی فوج کے خلاف لڑ رہی ہے۔
اسی دوران، آر ایس ایف نے ملک کے سب سے بڑے تیل کے ذخیرے، ہیجلیگ آئل فیلڈ، پر قبضے کا بھی دعویٰ کیا ہے۔
یاد رہے کہ سوڈان میں 2023 سے حکومت اور باغی ملیشیا کے درمیان جھڑپیں جاری ہیں اور اقوامِ متحدہ کے مطابق اب تک اس تصادم میں 13 ہزار سے زائد افراد ہلاک ہو چکے ہیں۔
یہ حملہ سوڈان میں جاری خانہ جنگی کے دوران بچوں اور شہریوں کو درپیش خطرات اور انسانی بحران کی ایک اور دردناک تصویر پیش کرتا ہے۔