سرگودھا (کیو این این ورلڈ) تھانہ لکسیاں کے علاقے میں پولیس کے ایک اہم چھاپے کے دوران مسلح افراد نے پولیس پارٹی پر اندھا دھند فائرنگ کر دی، جس کے نتیجے میں فرائض کی انجام دہی کے دوران ایس ایچ او جام شہادت نوش کر گئے۔ پولیس حکام کے مطابق یہ واقعہ اس وقت پیش آیا جب اہلکار علاقے میں مشتبہ افراد کی موجودگی کی اطلاع پر کارروائی کر رہے تھے کہ وہاں موجود ملزمان نے اچانک فائرنگ شروع کر دی، جس سے ایس ایچ او شدید زخمی ہوئے اور بعد ازاں زخموں کی تاب نہ لاتے ہوئے شہید ہو گئے۔
واقعے کے فوراً بعد حملہ آور فائرنگ کرتے ہوئے جائے وقوعہ سے فرار ہونے میں کامیاب ہو گئے جن کی گرفتاری کے لیے پولیس کی حراست ابھی تک عمل میں نہیں آ سکی ہے۔ پولیس نے فوری طور پر پورے علاقے کو گھیرے میں لے کر سرچ آپریشن کا آغاز کر دیا ہے اور ملزمان کے تعاقب کے لیے اضافی نفری بھی تعینات کر دی گئی ہے۔ ضلعی پولیس کا کہنا ہے کہ شہید افسر کی قربانی رائیگاں نہیں جائے گی اور دہشت گرد عناصر کو جلد از جلد قانون کے کٹہرے میں لایا جائے گا، جبکہ شہریوں سے بھی اپیل کی گئی ہے کہ وہ کسی بھی مشکوک سرگرمی کی اطلاع فوری طور پر پولیس کو دیں۔