ماسکو (کیو این این ورلڈ) روس اور چین کی قیادت نے دفاعی اتحاد کے تحت ایران اور وینزویلا سے متعلق مشترکہ حکمتِ عملی اپنانے کا فیصلہ کر لیا ہے۔ غیر ملکی خبر رساں ادارے کے مطابق روسی وزیر دفاع آندرے بیلوسوف اور چینی وزیر دفاع ڈونگ جون کے درمیان ویڈیو لنک کے ذریعے اہم رابطہ ہوا، جس میں عالمی سکیورٹی کی تیزی سے بدلتی صورتحال پر تفصیلی تبادلۂ خیال کیا گیا۔
روسی وزیر دفاع آندرے بیلوسوف نے گفتگو کے دوران کہا کہ موجودہ عالمی ماحول میں تیز رفتار تبدیلیاں رونما ہو رہی ہیں، جن کے پیش نظر دونوں ممالک کیلئے ضروری ہے کہ وہ عالمی سکیورٹی صورتحال کا مسلسل تجزیہ کریں اور ممکنہ خطرات کے مقابلے کیلئے مشترکہ اور بروقت جوابی اقدامات اختیار کریں۔ ان کا کہنا تھا کہ روس اور چین کے درمیان مستقل فوجی تعاون، مشترکہ مشقیں اور تجربات کا تبادلہ وقت کی اہم ضرورت بن چکا ہے تاکہ کسی بھی ہنگامی صورتحال میں مؤثر ردعمل یقینی بنایا جا سکے۔
بیلوسوف نے مزید کہا کہ دفاعی ہم آہنگی اور قریبی رابطہ کاری کے بغیر بدلتے ہوئے عالمی چیلنجز کا مقابلہ ممکن نہیں، اس لیے دونوں ممالک کو اپنے دفاعی تعلقات کو مزید وسعت دینی چاہیے۔
دوسری جانب چینی وزیر دفاع ڈونگ جون نے روسی ہم منصب کے مؤقف کی مکمل تائید کرتے ہوئے کہا کہ چین اور روس کے درمیان اسٹریٹجک تعلقات خطے اور دنیا کے استحکام کیلئے اہم ہیں۔ انہوں نے اس بات پر زور دیا کہ ہنگامی حالات میں مشترکہ ردعمل، قریبی مشاورت اور عملی تعاون دونوں ممالک کے دفاعی اتحاد کو مزید مضبوط بنائے گا۔
چینی وزیر دفاع کا کہنا تھا کہ عالمی سکیورٹی کے موجودہ حالات میں باہمی اعتماد، مشترکہ حکمتِ عملی اور عملی تعاون ناگزیر ہو چکا ہے، اور چین روس کے ساتھ مل کر اس سمت میں کام جاری رکھے گا۔