گلگت بلتستان کے ضلع ہنزہ کے علاقے پاسو میں ایک نادر اور تاریخی منظر کیمرے میں محفوظ کر لیا گیا، جہاں ایک مادہ برفانی تیندوے کو اپنے تین بچوں کے ساتھ دیکھا گیا۔
ماہرینِ تحفظِ ماحولیات کے مطابق یہ واقعہ اس خطے کی تاریخ میں صرف دوسری مرتبہ باقاعدہ طور پر دستاویزی شکل میں ریکارڈ ہوا ہے۔ برفانی تیندوے دنیا کے نایاب اور پوشیدہ جانوروں میں شمار ہوتے ہیں جو برفانی اور پتھریلے پہاڑی علاقوں میں قدرتی طور پر اس طرح گھل مل جاتے ہیں کہ انسانی نظر سے اکثر اوجھل رہتے ہیں۔ ایک سنو لیپرڈ کو کیمرے میں قید کرنا ہی بڑی کامیابی سمجھا جاتا ہے، ایسے میں چار برفانی تیندوؤں کا ایک ساتھ نظر آنا غیر معمولی واقعہ ہے۔
اس سے قبل ایسا منظر بلتستان کی ہُشے ویلی میں ریکارڈ کیا گیا تھا، جبکہ ہنزہ میں یہ ویڈیو اس نوع کی دوسری تصدیق شدہ دستاویز بن گئی ہے۔ یہ شاندار فوٹیج واکھان وائلڈ لائف ٹیم نے ریکارڈ کی، جو نایاب جنگلی حیات کی نگرانی اور تحفظ کے لیے مسلسل کام کر رہی ہے۔
ماہرینِ جنگلی حیات کا کہنا ہے کہ ایک مادہ تیندوے کا اپنے تین بچوں کے ساتھ نظر آنا اس بات کی علامت ہے کہ پاسو کا ماحولیاتی نظام صحت مند ہے، جہاں مناسب شکار دستیاب ہے اور انسانی مداخلت کم ہے۔ یہ کامیاب تحفظی اقدامات کا واضح ثبوت ہے۔
برفانی تیندوے عالمی سطح پر خطرے سے دوچار انواع میں شامل ہیں اور انہیں ماحولیاتی تبدیلی، قدرتی مسکن کے نقصان اور انسانی تنازعات جیسے سنگین خطرات لاحق ہیں۔ ایسے نایاب مناظر نہ صرف امید افزا ہیں بلکہ جنگلی حیات کے تحفظ کی اہمیت کو بھی اجاگر کرتے ہیں۔