محکمہ موسمیات نے پنجاب کے بیشتر اضلاع میں 20 اور 21 دسمبر کے دوران بارش اور برفباری کی پیشگوئی کی ہے۔ ترجمان پی ڈی ایم اے کے مطابق پنجاب کے پہاڑی علاقوں جیسے راولپنڈی، مری، گلیات اور پوٹھوہار ریجن میں گرج چمک کے ساتھ بارش اور برفباری کے امکانات ہیں۔
اس دوران لاہور، شیخوپورہ، سرگودھا، خوشاب، فیصل آباد، حافظ آباد، گجرانوالہ، منڈی بہاوالدین، گجرات، سیالکوٹ، جھنگ اور ٹوبہ ٹیک سنگھ میں ہلکی بارش متوقع ہے۔ محکمہ موسمیات کے مطابق بارشوں کے باعث دھند اور سموگ میں کمی آئے گی، جس سے ہوا کا معیار بہتر ہونے کی توقع ہے۔
پی ڈی ایم اے کے ڈی جی عرفان علی کاٹھیا نے شہریوں کو ہدایت کی ہے کہ سموگ سے بچاؤ کے لیے ماسک کا استعمال کریں اور غیر ضروری طور پر باہر نہ نکلیں۔ شہری خراب موسم کی صورت میں غیر ضروری سفر سے گریز کریں۔
سیاحوں کے لیے بھی احتیاطی ہدایات جاری کی گئی ہیں۔ مری میں سیاح حفاظتی تدابیر اختیار کریں اور پی ڈی ایم اے کی ہدایات پر عمل کریں۔ سیاحوں کی سہولیات کے لیے مری میں مختلف مقامات پر فسیلیٹیشن سنٹرز قائم کیے گئے ہیں، جہاں ہنگامی امداد اور معلومات دستیاب ہوں گی۔
پی ڈی ایم اے کنٹرول روم میں صورتحال کی مانیٹرنگ 24 گھنٹے جاری ہے تاکہ موسمی حالات کے مطابق فوری اقدامات کیے جا سکیں۔