مغربی ہواؤں کا نیا سلسلہ،کل سے ملک بھر میں بارشیں اور برفباری کاامکان

اسلام آباد (ویب ڈیسک): محکمہ موسمیات پاکستان نے پیشگوئی کی ہے کہ مغربی ہواؤں کا ایک نیا سلسلہ کل (29 دسمبر) سے ملک کے مغربی علاقوں میں داخل ہوگا، جس کے نتیجے میں آئندہ چند روز تک ملک کے مختلف حصوں میں وقفے وقفے سے بارشیں اور بالائی علاقوں میں برفباری کا سلسلہ جاری رہنے کا امکان ہے۔
محکمہ کے مطابق یہ سلسلہ 30 دسمبر سے مزید شدت اختیار کرے گا اور 31 دسمبر کو بالائی اور وسطی علاقوں کو مکمل طور پر اپنی لپیٹ میں لے لے گا۔ یہ نظام 2 جنوری 2026 تک بالائی علاقوں میں برقرار رہ سکتا ہے، جس سے سردی کی لہر میں بھی اضافہ ہوگا۔

بلوچستان
محکمہ موسمیات کے مطابق آج رات سے لے کر 31 دسمبر تک بلوچستان کے متعدد اضلاع میں تیز ہواؤں اور گرج چمک کے ساتھ بارش متوقع ہے جبکہ پہاڑی علاقوں میں برفباری کا امکان بھی ہے۔
متاثر ہونے والے علاقوں میں کوئٹہ، زیارت، چمن، پشین، قلعہ عبداللہ، قلعہ سیف اللہ، نوشکی، ہرنائی، ژوب، قلات، بارکھان، سبی، لورالائی، موسیٰ خیل، تربت، گوادر، جیوانی، لسبیلہ، کیچ، آواران، چاغی، پنجگور، خضدار، واشک اور خاران شامل ہیں۔

سندھ
سندھ کے مختلف شہروں میں انہی ایام کے دوران چند مقامات پر ہلکی بارش یا بوندا باندی کا امکان ظاہر کیا گیا ہے۔
کراچی، حیدرآباد، دادو، جیکب آباد، کشمور، لاڑکانہ، ٹھٹھہ، بدین اور ان کے گردونواح میں ہلکی بارش ہو سکتی ہے۔

خیبر پختونخوا
30 دسمبر سے یکم جنوری تک صوبے کے بالائی اور وسطی علاقوں میں تیز ہواؤں اور گرج چمک کے ساتھ وقفے وقفے سے بارش کا امکان ہے جبکہ بالائی اضلاع میں درمیانی سے شدید برفباری بھی متوقع ہے۔
چترال، دیر، سوات، شانگلہ، کوہستان، بٹگرام، مانسہرہ، ایبٹ آباد، ہری پور، بونیر، باجوڑ، مہمند، خیبر، اورکزئی، کرم، وزیرستان، پشاور، چارسدہ، نوشہرہ، صوابی، بنوں، کرک، ڈیرہ اسماعیل خان، ٹانک اور کوہاٹ متاثر ہوں گے۔

گلگت بلتستان اور کشمیر
30 دسمبر (شام/رات) سے 2 جنوری تک گلگت بلتستان اور کشمیر کے مختلف علاقوں میں تیز ہواؤں اور گرج چمک کے ساتھ بارش جبکہ پہاڑوں پر درمیانے درجے کی برفباری کا امکان ہے۔
گلگت بلتستان کے دیامیر، استور، غذر، سکردو، ہنزہ، گلگت، گانچھے، شگر اور کشمیر کے وادی نیلم، مظفرآباد، پونچھ، ہٹیاں، باغ، حویلی، سدھنوتی، کوٹلی، بھمبر اور میرپور میں بارش اور برفباری متوقع ہے۔

پنجاب اور اسلام آباد
30 دسمبر (شام/رات) سے 2 جنوری تک مری اور گلیات میں تیز ہواؤں، گرج چمک کے ساتھ بارش اور پہاڑوں پر برفباری کا امکان ہے۔
31 دسمبر اور یکم جنوری کو اسلام آباد، راولپنڈی، خطہ پوٹھوہار، سرگودھا، فیصل آباد، منڈی بہاؤالدین، سیالکوٹ، نارووال، لاہور، شیخوپورہ اور گجرات میں تیز ہواؤں اور گرج چمک کے ساتھ بارش متوقع ہے۔
اسی دوران 31 دسمبر کو میانوالی، بھکر، سرگودھا، خوشاب، نورپورتھل، لیہ، ڈیرہ غازی خان، ملتان، بہاولپور، رحیم یار خان، بہاولنگر، مظفر گڑھ، جھنگ اور ساہیوال کے چند مقامات پر بھی تیز ہواؤں اور گرج چمک کے ساتھ بارش ہو سکتی ہے۔