شکرگڑھ: وفاقی وزیر منصوبہ بندی احسن اقبال نے کہا ہے کہ پاکستان تحریک انصاف (پی ٹی آئی) کو فیصلہ کرنا ہوگا کہ وہ ریاست کے ساتھ کھڑی ہے یا متنازع قیادت کے ساتھ۔ اپنے آبائی حلقے شکرگڑھ میں میڈیا سے گفتگو کرتے ہوئے انہوں نے کہا کہ ڈی جی آئی ایس پی آر نے قوم کے جذبات کی ترجمانی کی اور افواج پاکستان نے ملک کی حفاظت اور دہشت گردی کے خلاف جنگ میں تاریخی کامیابیاں حاصل کی ہیں۔
احسن اقبال نے کہا کہ سیاسی فائدے کے لیے ریاست اور افواج پر تنقید ملک دشمنی کے مترادف ہے اور عسکری قیادت پر تنقید ناقابلِ قبول ہے، جبکہ قوم ہمیشہ افواج کے ساتھ کھڑی ہے۔
وفاقی وزیر نے کہا کہ پی ٹی آئی کی موجودہ صورتحال اس کی اپنی طرزِ سیاست کا نتیجہ ہے اور اگلے انتخابات میں عوام ایسے رویے کو مسترد کرے گی۔ انہوں نے واضح کیا کہ پاکستان موجودہ عالمی حالات میں انتشار کا متحمل نہیں ہوسکتا اور گزشتہ دو سال میں ملک کو معاشی تباہی سے نکالا گیا ہے۔
احسن اقبال نے مزید کہا کہ اگلے تین سال فیصلہ کن ہیں اور مستقبل کے لیے اتحاد ضروری ہے۔ مسلم لیگ ن اگلی نسل کو روشن اور خوشحال پاکستان دینا چاہتی ہے اور نفرت و گالی گلوچ کی سیاست کو عوام پہلے ہی مسترد کر چکے ہیں۔